وسلوالو په بټي کوټ ولسوالۍ کې دوو ښوونځيو ته اور واچاوه

(جلال اباد  ( پژواک ٢٤ تله ٩٠ ) : د دولت وسلوالو مخالفينو د ننګرهار ولايت په بټي کوټ ولسوالۍ کې د نجونو دوو لېسو ته اور ورته کړى، چې يوه يې سوځېدلې او دويمه يې زيانمن شوې ده.

د بټي کوټ ولسوال اسرار الله قاري زاده د تلې په ٢٤مه، پژواک خبري اژانس ته وويل ، چې تېره شپه ناپېژانده وسلوالو د دغې ولسوالۍ د چهاردي او باريکاب د نجونو لېسو ته اور اچولى، چې  په وينا يې ډېر زيانونه ورته اوښتي دي .

د چهاردي د لېسې ساتونکي فصل ربي پژواک ته وويل ، چې تېره شپه د ماخوستن له لمانځه  وروسته  ښوونځي ته څو  وسلوال را ننوتل.

نوموړي زياته کړه، چې د وسلوالو شمېر له دېرشو تنو څخه زيات او له ټولو سره پيکا او راکټونه وو.

فضل ربي وويل: (( ټولو وربوزونه وهلي ول، زه يې په مرګ وګواښلم او لېسه ته يې اور واچاو.))

د دغه ښوونځي يو ښوونکي حنيف الله ساپي پژواک ته وويل چې په ښوونځي کې يې دوه زره دوه سوه نجونې زده کړې کوي.

 د نوموړي پروينا، د تېرې شپې اور لګېدنې د لابراتوار او کتابتون په ګډون درې خونې او پنځلس  برنډې سوځولي، چې د لابراتوار وسايل، کتابونه او د حاضرۍ کتابونه يې له منځه وړي دي.

د يو بل خبر له مخې، وسلوالو د شپې پر نهو بجو ددغه کلي پر لوېديځ درې کيلومترۍ کې د باريکاب د نجونو لېسې ته اور اچولى، چې برنډه او دوه خونې يې لږې زيانمنې کړې دي.

د باريکاب يوتن اوسېدونکي روزي خان الکوزي پژواک ته وويل چې د کتابونو، ښوونځيو او مدرسو سوځول د اسلام او انسانيت خلاف عمل دى.

 نوموړي زياته کړه، هر څوک چې ښوونځي سوځوي، د اسلاميت او افغانيت دوښمنان دي.

د روزي خان په وينا، له اور لګېدنې سمدستي وروسته يې له نورو کليوالو سره يوځاى اور مړ کړ.

نوموړي زياته کړه، چې د باريکاب په لېسه کې نهه سوه يو پنځوس نجونې په زده کړو بوختې دي.

د ننګرهار د پوهنې رياست وياند محمد اصف شينواري پژواک ته يادې پېښې تاييد کړې او ويې ويل چې سيمې ته يې پلاوى لېږلى، څو د اوښتو زيانونو کچه معلومه کړي.

د يادونې ده، چې تېره مياشت د ننګرهار په چپرهار ولسوالۍ کې هم وسلوالو دوه ښوونځي سوځولي وو.

طالب وياند ذبيح الله مجاهد ددې ښوونځيو په سوځولو کې د طالبانو لاس لرل رد کړل.