له ډنمارک څخه د تسلیت پیغام

په ډېرې خواشینۍ سره مو خبر ترلاسه کړ چې د افغانستان  د راډیو ټلویزیون  پخوانۍ او نامتو ممثله او د هېواد د ډرام او تیاتر تکړه لوبغاړې انیسه وهاب  د  ورپېښې ناروغۍ له امله پرون په کابل کې وفات شوې .( الله دې ښه جنتونه ورپه برخه کړي ).
انیسه وهاب د نږدې څلویښتو کالو راپه دې خوا د افغانستان د ملي راډیو او وروسته بیا د افغانستان د ملي ټلویزیون او افغان فلم له لارې د دري تیاتر او تمثیل په کار کې صادقانه خدمت وکړ او د افغان تیاتر د یوې ستورې په توګه وځلېده . خدای بښلې انیسه وهاب د مرحوم استاد رفیق صادق تر نظر لاندې د تیاتر او تمثیل د ادارې په پیاوړتیا کې فعاله ونډه واخیسته .انیسه وهاب د  دري ډرام او داستان د یوې بې تعصبه  هنرمندې په توګه د پښتو ډرام او داستان د لوړتیا ډېره لیواله وه ، هغې د خدای بښلي استاد ف .فضلي او ارواښاد استاد منان ملګري تر لارښوونې لاندې په څو پښتو تیاترونو او ډرامونو کې هم فعاله ونډه ترسره کړه او د پښتو څانګې ټول پخواني او تازه  ممثلین د انیسې وهاب مړینه د ټول هېواد د تیاتر لپاره یوه لویه ضایعه ګڼي  .                                                                              
د خپلواکۍ فرهنګي مرکژ په دې توګه د ارواښادې وهاب له کورنۍ  ، خپلوانو او د هېواد د تیاتر او تمثیل د سترې ټولنې  له هرغړي سره خپله غم شریکي اعلانوي او په داسې حال کې چې خدای بښلې ته د لوی خدای  له دریبار څخه  د مغفرت هیلاه کوو ،د افغانستان د راډیو ټلویزیون  د ډرام او داستان  او د تیاتر  ټولو غړو ته د جمیل صبر غوښتنه کوو
.الله دې د افغانستان د تیاتر او تمثیل  د ټولو هنرمندانو مل شي .
په ټول درنښت
د خپلواکۍ د فرهنګۍ‎ مرکز په استازیتوب

یوسف هېواددوست