دعبدالحمید مومند کلیات

دپښتو شاعرۍ  داسمان په لمن کې  عبدالحمید  مومند  هغه بل او ځلاند ستوری دی ، چې  ترڅو دپښتو ادب اسمان ولاړ وي  ، داستوری    به  پلوشې  خپروي .

ددغه نازک خیاله  شاعر  کلیات  چې  سریزه  ،  څېړنه  ،  اوډون او ویبپانګه یې   دروند استاد محمد آصف صمیم  لیکلې  په زړه  راښکونکې  رنګه پښتۍ  په ۸۰۰  مخونو کې چاپ   شوي  .

   دکتاب په پیل کې دخپرندویې ټولنې  (  دانش خپرندویه ټولنه  )  یادښت ،  داستاد محمد آصف  صمیم  عالمانه سریزه  او دپښتۍ  په څلورم  مخ  د کوزې  پښتونخواه  د نامتو لیکوال  همېش خلیل  یادښت تر سترګو کېږي  .  په وروستیو ۳۰ مخونو کې  د لوستونکیو  داسانتیا  لپاره  ویب پانګه څای کړی شوې ده .

 دحمید مومند  کلیات  په لاندې  برخو وېشل شوی  دی  :

 .. دعبد الحمید  مومند کلیات  ----    ۳۳۲-۱ مخ

.. نیرګ عشق                                        ---- ۳۳۳- ۵۴۸ مخ

.. قصه  شاه وګدا                               ---  ۷۷۰-۵۴۹  مخ

ویبپانګه                                            ---- ۸۰۰-۷۷۰  مخ

 عبد الحمید مومند دپښتو په ادبي  حلقو کې د حمید ( ۱ )  ،  حمید ماشوخېلي ( ۲ )  ، ماشو وال عبدالحمید (۳)  ،   حمید خان (۴)  ،  عبدالحمید  (۵)  ،  او موشګاف عبدالحمید ( ۶ )  په نومو ځلېدلی .

 (۱ ) :  دپښتو ژبې په شعر په داخپله زمانه کې 

          پرې دې نښود قلندره  بې حمیده بل حریف  /  قلندر ۴۴

(۲)   : په ورو  ورو  چې شوه پېغلو کې زلفوره

          دحمید ماشوخېلي په لاس شانه  /  حمزه بابا

( ۳ )   : رحمت بیا په ماشووال  عبد الحمید شه

           چې جوړ کړی ده کتاب دی  ښه روښان   / عبدالحمید راڼیزی / ۷۰

 ( ۴ )   :  بیا په دور دتېمورشاه او دل له واړه

              ماشوخېلو کې راوخوت  حمید خان  /  رضواني بهارستان افغاني  / ۱۳۸

( ۵ )   :  چرته نه چې  باد خبر عبدالحمید کا

            چې کامګار غزل دستا په مضمون ووې  / دیوان ۴۲

( ۶ )   :   پس له دوی نه موشګاف عبدالحمید دی

             چې مې ووې ښه نازک نکته دان شعر / پیر محمد کاکړ / ۴۲

(۷)   :   پس له ده نه موشګاف  عبدالحمید دی 

         باریکي یې دکلام ده ځان دشعر  /  شمس الدین کاکړ / ۴۱