پاکستاني طالبانو ومنله چې مشر يې وژل شوى دى
09.02.2010 10:15په پاکستان کې د طالبانو تحريک له اوږده ځنډ وروسته د لومړي ځل لپاره منلې چې د دوى مشر حکيم الله محسود وژل شوى دى.
ځوان حکيم الله محسود وروسته له هغې د پاکستاني طالبانو د عمومي مشر په توګه وټاکل شو چې د تېر اګست په پنځمه نېټه د طالبانو پخوانى مشر بيت الله محسود د يوې بې پيلوټه طيارې په بريد کې ووژل شو. طالبانو تر ډېره وخته د هغه مړينه هم پټه ساتلې وه خو په پاى کې يې د يوې ويډيو په خپرولو سره د پاکستان او امريکا د حکومت ادعا تصديق کړه.
د بيت الله محسود له مړينې سمدستي وروسته د پاکستان حکومت دا ادعا هم وکړه چې حکيم الله محسود او د طالبانو يو بل پياوړى قوماندان ولي الرحمان د مشرۍ په سر په يوه خپلمنځي جګړه کې وژل شوي دي خو دغه او وروسته نورې ادعاوې محسود او ولي دواړو په خپله په وار وار سره رد کړې.
د حکيم الله محسود، چې د پاکستان حکومت يې پر سر دروند انعام هم ايښى و، د طالبانو د مشر په توګه له راښکاره کېدو وروسته په پاکستان کې پر حکومتي ځواکونو ځانمرګي او نور مرګوني بريدونه بېخي زيات شول چې په ځواب کې يې حکومت هم په جنوبي وزيرستان او نورو سيمو کې درانده عمليات ترسره کړل. د پاکستاني عملياتو تر څنګ امريکايي بې پيلوټه الوتکو هم په جنوبي وزيرستان کې د طالبانو ډېر داخلي جنګيالي او بهرني همکاران له منځه يوړل. خو د هغه په وړاندې د امريکايانو د زغم حد هغه وخت پاى ته ورسېد چې هغه په يو ويډيو کې د هغه تن سره راښکاره شو کوم چې په يو ځانمرګي بريد سره په خوست کې د سي ايي اى اوه لوړپوړي ماهرين وژلي وو. حکيم الله محسود د دغې پېښې له مسووليت اخيستلو لږې ورځې وروسته، د پاکستاني چارواکيو په ادعا، د يوې بې پيلوټه الوتکې د بريد ښکار شو.
د خوست په ولايت کې د سي ايي اى په مرکز دغه بريد د دسمبر پر ٣٠مه نېټه شوى و. څو ورځې وروسته حکيم الله محسود د هغې مسووليت واخيست او تر هغې څو ورځې وروسته د پاکستان يو چارواکي رحمان ملک د هغه د وژل کېدو ادعا وکړه. وروسته د بي بي سي اردو پاڼې د يو سيمييز قومي مشر په حواله هم وويل چې نوموړى وژل شوى دى او دغه مشر زياته کړه چې ده په خپله په اورکزي ايجنسۍ کې د هغه په جنازه کې ګډون کړى دى. مګر پاکستاني طالبانو بيا هم دا خبره ردوله او ويل يې چې حکيم الله به ډېر ژر د رسنيو په مخکې ښکاره شي. خو بيا يې وويل چې هغه ځکه رسنيو ته نشي ښکاره کېدلى چې امريکايان يې په لټه کې دي او غواړي چې له منځه يې يوسي.
خو نن د اورکزۍ ايجنسۍ طالب مشرانو پاکستاني رسنيو ته په تليفون کولو سره تصديق کړه چې حکيم الله محسود وزيرستان کې د بې پيلوټه الوتکې په بريد کې ټپي شوى و او له هغه ځايه کراچۍ ته د علاج لپاره وړل کېده چې په ملتان کې يې ساه ورکړه او بيا وروسته په اورکزي ايجنسۍ کې خاورو ته وسپارل شو. د پاکستان نامتو ژورنالست رحيم الله يوسفزي هم دغه خبره تاييد کړه او نړيوالو رسنيو لکه سي اين اين او نورو هم وويل چې د طالبانو باوري سرچينو د حيکم الله محسود مړينه تاييد کړه.
اوس پاکستاني چارواکي دا ادعا هم کوي چې تر حکيم الله وروسته د طالبانو د مشرۍ په سر په خپلمنځي جګړه کې د قاري حسين په نامه هغه تن هم وژل شوى چې د ځانمرګيو بريد کوونکيو ماهر يا استاد و. خو دا خبره طالبانو لا تر دې دمه نده تاييد کړې. اما په پاکستان کې ځينې کړۍ په دې فکر دي چې د طالبانو د دغو پياوړو مشرانو له وژل کېدو او د هغې په نتيجه کې د دوى ترمنځ د اختلافاتو د رامنځته کېدو له امله ډېر ژر ده چې دا تحريک له پښو ولوييږي. د داخلي چارو کوم ماهرين چې دا خبره کوي د هغوى پر وړاندې يو دليل د باجوړ د طالبانو دى چې پخوانى پياوړى قوماندان مولوي فقير محمد يې له مشرۍ ليرې کړى دى او دغې خبرې په سيمه کې د طالبانو ترمنځ سختو جنجالونو ته لاره هواره کړې ده.
د ليکوال څو نورې لیکنې
- افغان ترجمان دوه امريکايي عسکر ووژل
- سي ايي اى په خوست کې سخت ګوزار خوړلى
- د ملګرو ملتونو امريکايي چارواکي د کرزي د ليرې کولو پلان جوړ کړى و
- د پاکستان پوځ د يوې بلې کودتا لپاره لارې لټوي
- ننني حالات او خلک د باباګانو د شعرونو په هينداره کې
- ليکوالانو ته د غواګانو په روزنيز ورکشاپ کې د ګډون بلنه
- د ناارامو سيمو جگړو ارامې سيمې هم ځپلې دي
- گرده نړۍ بدلون غواړي خو، اوباما څه غواړي؟
- قران ته د ښځو واده کول
- بدر منير او باري سټوډيو، يو څو يادښتونه
هادي جانه،
محسود نه دی، مسعود دی. محسود له حسد څخه اخیستل شوی چې داسې چاته ویل کېږي چې کرکه ورنه کېږي او په دې ډول دا د پښتنو د یوه لوی قوم مسعودو سپکاوی دی.
درناوی
حامد