د لوی، مهربان او بخښونکي خدای په نامه

نن شپه افغانستان او زيمبابوی لوبه کوي. لوبه د تمرين په موخه ده.

خبري - څانګه 11.01.2010 18:02

نن شپه (۱۲جنوري ) د افغانستان د ۱۹ کاله ټيټ لوبډله د زيمبابوی د لوبډلې سره خپله دويمه تمريني لوبه کوي. لوبه د تمرين په موخه کېږي او رسمي لوبې د جنوري په ۱۵پيل کېږي.

لوبه به د نيوزيلاڼد په وخت سهار لس نيمې بجې دکرايسټچرچ په سيمه کې  چې د کابل په وخت بېګا ته ۲ بجې کېږي پيل کېږي.

د لوبې تفصيل د کرکټ د نړيوالې شورا په ويبپاڼه خپرېږي.

د تمرين لومړۍ لوبه ايرلينډ له افغانستان څخه په ۷ ويکټو ګټلې وه. د تمرين لوبې د افغانانو لپاره ځانګړی اهميت په دې لري چې معلومه به شي افغانان به د هندوستان او انګلستان غوندې پياوړو لوبډلو سره د مقابلې وړ وي او که څنګه ځکه چې دويم پړاو ته د بريالي کېدو لپاره افغانستان ته په کار دي چې له هندوستان، انګلستان او هانګ کانګ سره لوبه وکړي او لږ تر لږه دوه لوبډلو ته ماته ورکړي.

 د ايرلينډ سره له لوبې داسې ښکاري چې په کاناډا کې د ۱۹ ټيټ لوبډلې پنځه تکړه لوبغاړو پټېدل دې لوبډلې ته ستر زيان رسولی او لوبډله ورسره ډېره کمزورې شوې ده. په هغه کسانو کې چې پټ شول د تکړه توپ وهونکي او اچونکي شامل و. 

د ۱۹ کاله ټيټ لوبډلې په اړه بايد وويل شي چې نورالحق د لوبډلې کپتان غوره کړای شوی دی. پخوا به د لوبډلې کپتان شېرمحمد شېرزی و.