له مخ نه تورې ټاپې څنګه ورکولی شو؟

له مخ نه تورې ټاپې یانې توسیري یا کولازما څنګه ورکولی شو؟

له (درملنه) بلوګ څخه

پر مخ، پزه او یا تندي باندې خورمایي او یا تور بخنې ټاپې چې د حمل ضد درملو د کارولو او یا د حاملګۍ په وخت کې د هارمونیکو تغیراتو له کبله پیداکېږي د میلازما یا کولازما په نامه یادېږي چې پښتو کې ورته توسیري وایي.
په ټوله کې دغه خاپونه د مخ په هغو برخو کې چې د لمر وړانګو ته لوڅې وي پیداکېږي چې د حمل ضد درملو په پرېښودلو او یا د حمل وضع کولو سره د څو اونیو تر څو میاشتو په موده کې په خپله له منځه ځي چې د نوموړو دواګانو په بیا شروع کولو او یا د بیا حامله کېدو سره دوباره پیداکېږي اما په ځینو ښځو کې د پورتنیو لاملونو په نشتوالي کې هم پیداکېدای شي.

لاملونه:
۱- میلازما یا کولازما د پوستکي یوه عامه روغتیایي ستونزه ده چې ځوانو ښځو او حتی نارینه ووته هم پیداکېدای شي.
۲- میلازما یا کولازما په ټوله کې د زنانه جنسي هارمونونو (اسټروجن او پروجسټیرون) سره تړاو لري ځکه نو په حامله میندو او هغو ښځو کې چې د حمل ضد درمل کاروي پیداکېږي.
۳- د لمر وړانګو ته دوامداره مواجه کېدو له وجې هم پیداکېږي.
۴- د توسیري پیداکېدل ارثي منشا هم لري.
۵- داسې انګېرل کېږي چې د ماورا بنفش دواړه وړانګې اې او بي ددې ستونزې سبب کېدای شي.
۶- کېدای شي د میاشتنی عادت نه راتلل او د جنسي هارمونونو عدم توازن یې سبب شي.
۷- د ځینو درملو د استعمال له کبله هم پیداکېږي لکه د مرګي ضد دوا چې فنیټوین نومېږي.
۸- ځینی نارینه چې د ښکلا له پاره پر مخ باندې کېمیاوي مواد کاروي هم په ورته ستونزه اخته کېدای شي.
۹- د ویټامینونو کمښت په ځانګړی ډول د فولیک اسید کموالی یې هم سبب دی.

درملنه: توسیري د حمل وضع کېدو او د حمل ضد درملو د توقف سره په خپله له منځه ځي، کچېرې داسې ونه شول نو ډاکټر به داسې لارښوونه وکړي.

۱- کوښښ وکړﺉ چې د لمر له وړانګو نه ځان وساتیء.

۲- د لمر د وړانګو د مخنیوي په منظور دسهار له خوا د سن سکرین په نامه کریم و کاروﺉ.

۳- د هر ډول او ډیر صابون او شامپو کارولو نه ډډه وکړﺉ.

۲- دشپې له طرفه د هایدروکوینین لرونکی بلیچ استعمال کړﺉ.

۳-  سبزي، میوې او  ویټامین اې او فولیک اسید ډیر و خورﺉ.

که نوموړي کارونو سره ښه والی رانه شي نو  دشپې له طرفه ډیکسامیټازون یا بېتا مېتازون کریم استعمال کړﺉ.

او که بیا هم داغونه پاتې وي نو په ځانګړو مرکزونو کې د ماهرو ډاکټرانو پواسطه د لېزر په مرسته داغونه لرې کړﺉ.

اخستنځي:

 http://www.hpathy.com/diseases/chloasma-melasma-symptoms-treatment-cure.asp

http://www.amazingpregnancy.com/pregnancy-articles/282.html

 ستاسو د روغتیا په هیله.