د پښتونخوا وزرير اعلی د دير دوره وکړه او خلکو سره یې وليدل

د جون ٣٠مه کال ٢٠٠٩ء

وزيراعلی سيکرټرېټ

صوبه پختونخوا ـ پېښور

 وزيراعلی پښتونخوا ښاغلي اميرحېدرخان هوتي نن په لنډه دوره کوز دير ته لاړو اؤ هلته په افيسر مېس کښې ئې د دير قامي جرګې ته وېنا اوکړله ـ دوۍ وئيل چې مونږ سره چې د ستونزې د حل کولو بله لاره چاره پاتې نه شوه نو هله مو د شرخوښو په ضد کاروائي پيل کړله ـ دوۍ اعلان اوکړ چې په کوز اؤ بر دير کښې به د پوليسو نفري په دوه چنده زياته کړل کيږي ـ

په دې دوره کښې ددوۍ سره  صوبائي وزيران ميا افتخار حسېن ، حاجي هدايت الله خان اؤ نور لوړ پوړي افسران هم ملګري وو ـ

په دا موقعه سول او فوځي افسرانو وزيراعلی ته په علاقه کښې د امنيت او بې کوره شوو خلقو په باره کښې بريفنګ هم ورکړو ـ

ښاغلي اميرحېدرخان هوتي وئيل چې هرڅو چې په مالاکنډ کښې د اپرېشن کولو پرېکړه په زړه پورې نه وه ولې شرخوښو په سيمه کښې د ظلم بازار ګرم کړی وۀ اؤ زمونږ سره د مسئلې د حل بله لاره نه وه پاتې ـ  ده وئيل چې فساديان په تېخته دي اؤ ډېر زر به ددوۍ مشران هم خپل انجام ته اورسي ـ دوۍ په اولس غږ اوکړو چې شرخوښو له دې په خپلو صفونو کښې ځائې نه ورکوي اؤ د حکومت د چارواکو سره دې خپلې مرستې نورې پياوړې کړي ـ

دوۍ ددې خبرې يادونه اوکړه چې په مالاکنډ کښې به شرعي نظام عدل په هرحال کښې نافذولی شي ځکه چې دا د مالاکنډ د اولس خوښه ده ـ دلته به قاضيان ټاکل کيږي ـ اؤ د امنيت سره به د ترقياتي کارونو لړۍ پرمخ بوتلل کيږي ـ

 ښاغلي وزيراعلی وئيل چې په مالاکنډ کښې د شرخوښو ملا ماته شوې ده اؤ دوۍ د تېختې په حال کښې دي ـ ولې اوس دوۍ په وړو وړو بانډو کښې پناه اخيستل غواړي ـ

اميرحېدرخان هوتي د وسله والو د لاسه شهيد کړل شوي پخواني ضلعي ناظـم حاجي محمد اؤ د مېدان امام مولوي حبيب الرحمان د کورونو د پاره د مرستې په توګه د لسو لسو لکهو روپو د امداد اعلان اوکړو ـ ددې سره سره ددې کورنو يو يو وګړي ته د سرکاري نوکرۍ ورکولو منظوري ئې هم ورکړله ـ دوۍ ژمنه اوکړه چې د کوز دير د هغه خلقو سره به هم لاس مرسته کيږي څوک چې بې کوره شوي دي ـ  دوۍ ته به سم د لاسه امداد اولېږل شي ـ

دوۍ وئيل چې په دير ضلع کښې به د تحصيلونو اؤ پوليس اسټېشنو په شمېر کښې هم اضافه کيږي ـ  دوۍ زياته کړه چې په متاثره ضلعو کښې د بې کوره شوو کورنو د واپسۍ نه وړاندې به د امنيت ، بنيادي ضرورتونو په حقله هنګامي اقدامات ترسره کيږي ـ

 بل خوا نن سحر ښاغلي وزير اعلی په پختونخوا هاوس پېښور کښې د سوات ضلعې په وکيلانو کښې امدادي چيکونه تقسيم کړل ـ ٢٤٨ وکيلانو ته خواوشا ٧٤ لکهه روپۍ امداد ورکړل شو ـ  په دې موقعه وزيراعلی په خپل تقرير کښې وئيل چې که ضرورت پېښ شو نو مونږ به د مالاکنډ د بې کوره شوو خلقو د پالنې ، استوګنې ، بيا ابادۍ اؤ ترقۍ له پاره خپل کلنی ترقياتي پروګرام اوځنډو او دغه پېسه به په دوۍ خرڅ کړو ـ

په دې موقعه د عوامي ملي ګوند صوبائي مشر ښاغلی افراسياب خټک ، صوبائي وزيران ميا افتخار حسېن ، ارشد عبدالله نه علاوه د زپلې شوې سيمې صوبائي وزيران اؤ د صوبائۍ اسمبلۍ غړي هم ناست وو ـ

 بل اړخ ته د مالاکنډ بار ايسوسي اېشن اؤ درګۍ بار اېسوسي اېشن د جرګو سره په يو شريک ملاقات کښې ، کوم چې نن په پښتونخوا هاوس پېښور کښې اوشو ، ښاغلي اميرحېدرخان هوتي وئيل چې د وفاقي حکومت اؤ د ډونرز په مرسته به چې د متاثره ضلعو د بيا ابادۍ اؤ ترقۍ لپاره کوم پلان جوړيږي په هغې کښې به د بې کوره شوو ضلعو د اولس مېلمستوب کوونکې ضلعې هم شامليږي ـ

د ليکوال څو نورې لیکنې

• پنجاب بايد تقسيم کړل شي ، اباسين د ترهګرۍ مخه نه شي نيولی: اسفنديارولي
• وزيراعلی په ولي باغ چارسده کې د سنګين ولي خان کور او قبر له ورغلو او دعا يې وکړه
• د پښتونخوا وزير اعلی بې کوره شوي ژورناليستانو سره مرسته وکړه