د افغان کرکټ فدراسیون خبرتیا
03.02.2009 07:35کابل، د سلواغې ١٤مه
د افغانستان دکرکټ ملي لوبډله په ارجنټاين کې د درېيم پړاو په سياليو کې د اتلولۍ له ترلاسه کولو وروسته نن د سې شنبې په ورځ دسلواغې په ١٥مه چې د روان زېږدیز کال د فروري له درېيمې نېټې سره سمون خوري د سهار په لسو بجو د کابل نړيوال هوايي ډګر ته رارسي .
له ټولو محترمو رسنيو ، هېواد والو او د کرکټ مينه والو څخه هيله کېږي چې د ملي لوبډلې د هر کلي لپاره د کابل نړيوال هوايي ډګر ته ځان ورسوي .
د افغانستان د کرکټ فدراسیون له حکومتي چارواکو هم غواړي چې د هېواد د نورو لوبغاړو په څېر د کرکټ د ملي لوبډلې د لوبغاړو د تود هرکلي لپاره جدي اقدامات وکړي.
جاوېد هميم کاکړ
د افغانستان دکرکټ فدراسیون وياند