غزل: دردانې غواړي ...

 دردانې غواړي چې ستا د غاړې هار شي
 ستوري هم تمه لري چې دې مدار شي
 
 دا ته هسې سپین تندی په کاڼو ولې
 دا هنداره ده ، یو وخت به دې پکار شي
 
 ویده لمر به څه درانه خوبونه ویني
 چې شبنم د ګل پر پاڼو باندې بار شي
 
 دا ساړه ساړه بادونه څه پېغور کا
 ګل به غېږې له راځي ، خو چې بهار شي
 
 په ښکاره له خندا شین ، د ننه سوزم
 طبیعت مې د قاضي بابا چنار شي
 
 چې هر ستوری ورته خپله رڼا لارکړي
 دا سړی واعظه څنګه نو په لار شي