خلیلزاد: له طالبانو سره پر لنډمهالي حکومت خبرې نه دي شوې

په قطر کې له طالب استازو سره د امریکا تر خبرو وروسته، زلمي خلیلزاد کابل کې له ولسمشر غني سره خبرو کې ویلي، د نظام د راتلونکي جوړښت په اړه یې له طالبانو سره هېڅ راز خبرې او بحث نه دی کړی.

"ملا برادر به پر مناسب وخت قطر ته ولاړ شي"

د وسله والو طالبانو ویاند ذبیح الله مجاهد بي بي سي ته ویلي، د دې ډلې یو مهم مشر او په قطر کې د دوی د سیاسي دفتر نوی ټاکل شوی رئیس ملا برادر اخوند تر اوسه قطر ته نه دی تللی، خو په یو مناسب وخت کې به هلته ولاړ شي او خپل نوی مسوولیت به پر غاړه واخلي

پاکستان مزار شریف کې خپله کونسلګري وتړله

د پاکستان د بهرنیو چارو وزارت په یوه اعلامیه کې ویلي، د افغانستان د بلخ ولایت په مرکز مزار شریف ښار کې یې خپله کونسلګري وروسته له هغه تړلې چې یوې نجلۍ هڅه وکړه چې خپل لاسي بکس کې یو لاسي بم کونسلګرۍ ته د ننه یوسي، خو بریالۍ نشوه

افغانستان اول ځل شوکاڼی بهر ته صادر کړ

د افغانستان د کانونو او پټرولیم وزارت وایي، د لومړي ځل لپاره بشپړ پروسس شوی شوکاڼی یا (تالک) اردون ته ولېږداوه. شوکاڼی هغه ګرانبیه ډبره ده چې په شااوخوا ۷۰ صنعتونو کې ترې ګټه اخیستل کیږي. د شوکاڼي د پروسس یوه افغان کمپنۍ وایي چې په برتانیا، جرمني، چین، هند، ترکې او یو شمیر نورو هېوادونو کې یې د شوکاڼي د خرڅلاو څانګې جوړې کړې دي.

طالب سرچینه: د قطر خبرو پایله به ژر اعلان شي

طالبانو ته یوې نژدې سرچینې بي بي سي ته وویل، د قطر په دوحه کې به د وسله والو طالبانو او امریکايي دیپلوماتانو تر منځ له یوې اونۍ راهیسې د روانو خبرو پایلې ډېر ژر په یوه ګډه اعلامیه کې اعلان شي. بل لور ته افغان حکومتي سرچینې وايي، د امریکا بهرنیو چارو وزارت ځانګړی استازی زلمی خلیلزاد په قطر کې له طالب استازو سره له خبرو وروسته کابل ته روان شوی.

د پښتون ژغورنې غورځنګ پر ضد د پاکستاني پوځ نوې تګلاره

په تېرو څو مياشتو کې د پښتونخوا په پوځي مرکزونو يا د پوځ د لوړپوړو چارواکو په دفترونو کې د پوهنتونونو زدکوونکي او ښوونکي داسې غونډو ته بلل شوي، چې پکې د دې تنظيم هڅې منفي بلل کيږي.

غني: په تېرو ۴ کلونو کې ۴۵ زره افغان ځواکونه وژل شوي

افغان ولسمشر محمد اشرف غني وايي، له ۲۰۱۴ راهیسې تر اوسه تر ۴۵ زرو ډېر افغان ځواکونه له اورپکو سره په جګړه کې وژل شوي. غني دا څرګندنې داسې مهال کړې چې د قطر دوحه کې د طالب او امریکايي استازو ترمنځ‌ خبرې شپږمې ورځې ته غځېدلې دي.‌

د افغان-ترک ښوونځي ښوونکي وايي، پولیسو پرې 'برید کړی'

د بلخ مرکز مزارشریف کې د افغان- ترک ښوونځي یو شمېر ښوونکي وايي، پولیسو نیمه شپه پر دغه ښوونځي 'برید کړی دی. یوه ښوونکي له بي بي سي سره خبرو کې ادعا وکړه چې نیول شویو کې ترکان هم شامل دي.

' د طالبانو او امریکا تر منځ خبرې شپږمې ورځې ته وغځېدې'

وسله والو طالبانو ته نژدي سرچينې وایي، د قطر پلازمېنه دوحه کې د دوی او امریکایي استازو ترمنځ نن تر نیمې ورځې پورې خبرې روانې وې او سبا شنبه به هم دغه خبرې دوام وکړي. یوشمېر لویدیځو رسنیو په قطر کې د طالب او امریکایي چارواکو په شویو خبرو کې د پرمختګ خبره کړې ده.

پنځو مسلو د طالبانو او امریکا خبرې تر پنځو ورځو وغځولې

د طالبانو او امریکا استازي په پنځمه ورځ هم قطر کې خبرې لري. دا خبرې چې د دوو ورځو لپاره پیل شوې وې ټاکلې وه د پنجشنبې په ورځ پای ته ورسېږي. خو دې بهیر ته نږدې سرچینو بي بي سي ته ویلي، چې د تخنیکي ستونزو له امله جمعې ورځې ته هم دا خبرې وځنډول شوې.

غني: د پاکستان ګټه له افغانستان سره په همکارۍ کې ده

افغان ولسمشر محمد اشرف غني ویلي، د پاکستان ګټه په کې کې ده چې د ترهګرۍ ضد مبارزې او سوداګرۍ برخه کې له افغانستان سره همکاري وکړي، که نه د تل لپاره به یو بې وزله هېواد وي. ښاغلي غني وویل، هېواد یې چمتو دی له پاکستان سره ګډ فعالیت وکړي.

ملا برادر د طالبانو د سیاسي دفتر مشر شو

د طالبانو یو مهم مشر ملا عبدالغني برادر په قطر کې د دې ډلې د سیاسي دفتر مشر ټاکل شوی دی. د طالبانو رهبري شورا رسنیو ته په یوه استول شوې اعلامیه کې د نوموړي ټاکنه تائيد کړې ده. ویل کېږي چې ملا برارد وار له مخه قطر ته رسېدلی دی

د طالب او امریکايي پلاوي څلورمه ورځ خبرې او زیاتې شوې هیلې

د څلورمې او ښایي وروستۍ ورځې لپاره طالب وسله وال نن بیا له واشنګټن سره د افغانستان پر برخلیک په عربي هېواد قطر کې جرګه کېدونکي دي. بي بي سي ته ځینېو سرچینو ویلي چې دواړه لوري د بهرنیو ځواکونو پر وتلو هوکړې ته رسېدلي دي.

۹ کلن پاکستاني ماشوم د خپلې کورنۍ وژونکي رسوا کړل

پاکستان کې یوه ۹ کلن ماشوم له هغه څو ساعته وروسته د خپلې کورنۍ قاتلین رسوا کړل، چې د شنبې پر ورځ یې مور پلار او خور د امنیتي ځواکونو په ډزو کې ووژل شول. هغه پېښه کې د ترهګرۍ ضد ځواک ادعا کړې وه، چې د پنجاب ایالت ساهیوال ښار کې یې د استخابراتي معلوماتو پر بنسټ څلور 'ترهګر' وژلي

ملي امنیت: د میدان وردګو برید طراح مو وژلی

د افغانستان د ملي امنیت عمومي ریاست ادعا کوي چې د میدان وردګو ولایت د وروستي خونړي برید طراح او ۷ نور وسله وال مخالفان یې په یوه هدفي برید کې وژلي دي. بل لور ته وسله والو طالبانو په یوه خبر پاڼه کې د چارواکو دغه ادعا رد کړې ده. دوې ورځې مخکې د میدان ښار په هغه برید کې لسګونه کسانو ته مرګژوبله اوښتې وه.