BBC
 شاته

پاکستان په خیبر قبایلي سیمه کې د داعش ضد عملیات پیل کړل

ر د انځور حقوق Getty Images
Image caption د پاکستان امنیتي ځواکونه خیبر څلور د ردالفساد عملیاتو برخه بولي.

د پاکستاني پوځ ویاند وايي، چې د قبایلي سیمې خیبر په راجګل کې یې د داعش یا اسلامي دولت ډلې پرضد د خیبر څلور عملیات پیل کړل.

راجګل خورا سخته سیمه ده، چې ۲۵۰ کیلومتر مربع براخه ده او له ۱۲ تر ۱۴ زرو فوټو لوړ غرونه لري.

د پاکستان پوځي چارواکي دا عمليات په دغه هېواد کې د اسلامي دولت نومې ډلې د اغېز غځېدا مخنيوي لپاره مهم بللي.

* پنجاب مشکوک پښتانه افغانان

* ميا افتخار حسين: پښتانه ټول افغانان دي

* عمران خان: پنجاب کې له پښتنو سره توپيري چلند د ترهګرو په ګټه دی

پاکستاني چارواکو تل دا خبره رد کړې چې گواکې اسلامي دولت نومې ډلې دې په دغه هېواد کې دننه ځالې جوړې کړې دي.

دا په داسې حال کې ده چې له څه د پاسه تېرو دوو کلونو په پاکستان کې د ځینې بريدونو پړه همدې ډلې په غاړه اخيستې.

خو اوس پاکستانى پوځ وايي په خيبر ايجنسۍ کې يې د اسلامي دولت نومې ډلې د اورپکو پر وړاندې پراخ عمليات پيل کړي.

د پوځ وياند تورنجنرال غفور وايي، په دې وروستيو کې اسلامې دولت نومې ډلې ډيورنډ کرښې سره نژدې د خېبر ايجنسۍ په راجګل کې خپل شتون پراخ کړى.

له افغان حکومت غوښتنه

د انځور حقوق AFP
Image caption تورنجنرال غفور له افغان حکومت هیله لرِي چې د عملیاتو له سیمې سره د ډیورنډ کرښې دې غاړې ته دوی هم د وسلوالو د تښتېدلو مخنیوی وکړي.

جنرال غفور وايي دا به غوره وي چې افغان حکومت د عملياتو سيمې ته نژدې د ډيورند کرښې افغان غاړې ته د اوښتونکو اورپکو مخنيوى وکړي:

"اوسمهال هغه مرسته چې دوى(افغان حکومت) یې موږ سره کولى شي دا ده چې زموږ د عملياتو د سيمې په بله غاړه کې ځواکونه ځاى پر ځاى کړي، په دې توگه د هغو ترهگرو مخنيوى وکړي چې افغانستان ته تښتي. دا د گډو عملياتو په مفهوم دي. دا په دې مانا نه ده چې نور ځواکونه دې زموږ خاورې ته واوړي، هېڅکله نه. تراوسه ټول عمليات په خپله پاکستاني ځواکونو کړي."

* ډيورنډ لاين: نړيواله پوله که د بېلتون کرښه؟

* الطاف حسین: پاکستان کې په لوی لاس پښتانه ځپل کېږي

* خټک: د اقتصادي دهلېز نوې نقشه پښتونخوا بې برخې کوي

د خېبر څلور په نوم دغه عمليات د پاکستان په لر او بر کې د ردالفساد په نامه د روانو عملياتو برخه ده.

د رد الفساد په نامه عملیات تېره فبروري وروسته له هغه پيل شول چې په پاکستان کې اورپکو يو لړ بريدونه وکړل.

دې عملیاتو سخت غبرګونونه هم وپارول او منتقدينو يې ادعا کوله چې په کې تر ډېره پښتانه او افغانان په نښه کېږي.

د انځور حقوق AFP
Image caption پاکستان تل په خپله خاوره کې د اسلامي دولت ډلې شتون رداوه، خو اوس وايي، دا ډله د رېښو غځولو هڅه کوي.