ولې د هندي او پاکستاني جاسوسانو پر مینه جوړ فلم بندیز لګېدلی؟
د پاکستان د اطلاعاتو او خپرونو وزارت په دغه هېواد کې د سینماګانو پر پرده د "ټایګر زنده هی"، فلم ښودو ته اجازه نه ده ور کړې.
په دغه فلم کې سلمان خان د هندي څارګرې ادارې (را) او کترینه کیف د پاکستان د څارګرې ادارې (ای، ایس، ای) د جاسوسانو رولونه لوبولي او دواړه له یو بل سره مینه لري.
د پاکستان د فلم ارزونې (سانسور) بورډ مشر مبشر حسن له بي بي سي سره په خبرو کې وویل، دا کار د فلم ارزونې د مرکزي بورډ په سپارښتنه شوی دی.
* په سعودي عربستان کې پر سینما بندیز لېرې کېږي
* انوشکا شرما او ویرات کوهلي سره واده شول
* سینماګانو ته د هندي سختدریځو ګواښ
* ویدیا بالن: خلک مې چاغه بولې، بده یې نه ګڼم
نوموړي زیاتې کړې، د فلم له ټرېلره او همدارنګه په خواله رسنیو کې له خپرو شویو موادو څرګندېږي چې په فلم کې د پاکستان د امنیتي ادارو او نورو سپکاوی شوی دی.
د هغه په ټکیو، په دې برخه کې د فلم ارزونې د مرکزي بورډ دریځ روښانه دی او هغه دا چې پر ملي ارزښتونو هیڅ جوړجاړی نه کوي.
خو د دغه فلم اجرایوي لارښود سلیمان لالا بي بي سي ته ویلي، دوی ته ویل شوي چې په پاکستان کې د یاد فلم خپرېدو ته اجازه نه شته، خو کوم لامل یې نه دی په ګوته کړی.
نوموړي زیاته کړې، غوره به داوه چې د فلم ارزونې بورډ لومړی فلم لیدلی وای او بیا یې د خپرېدو او نه خپرېدو اجازه ور کړې وای:
"که په فلم کې د پاکستان او اسلام خلاف خبره وای، موږ به خپله د فلم د خپرېدو خبره نه وای کړې."
ټول بهرني فلمونه چې په پاکستان کې نندارې ته وړاندې کېږي، باید د دغه هېواد د اطلاعاتو او خپرونو له وزارته اجازه واخلي.
د فلم له ټرېلره معلومېږي، چې سلمان خان د هندوستان او کترینه د پاکستان د څارګرو ادارو د پخوانیو کارکوونکو رول لوبولی دی.
په فلم کې دواړه سره یو ځای کېږي او په عراق کې پر یوه ماموریت کار کوي.
پاکستان په ۲۰۱۲ کال کې هم د سلمان خان او کترینه کیف "ایک تا ټایګر" فلم ته د سینما پر پردو د نندارې اجازه ور نه کړه.
اصلا "ټایګر زنده هی"، فلم د "ایک تا ټایګر" فلم دوام دی.
په دغه فلم کې هم سلمان خان د هندوستان او کترینه کیف د پاکستان د څارګرو ادارو جاسوسان وي، چې له یو بل سره مینه لري او د فلم په پای کې دواړه له خپلو ادارو سره کار پرېږي دي او د تېښتې لار خپلوي.