ایرلنډ له افغانستانه دویمه یوه ورځنۍ لوبه وګټله
ایرلنډ د ۵۱ منډو په توپیر سره له افغانستانه د کرېکټ یوه ورځنۍ لوبه وګټله.
شارجه کې د پنجشنبې پر ورځ د درېیو نړیوالو یوه ورځنیو لوبو لړۍ دویمه لوبه کې لومړی ایرلنډ لوبه وکړه او افغانستان ته یې د ۲۷۲ منډو هدف وټاکه.
د ایرلنډ ۹ لوبغاړي سوځېدلي وو.
افغانستان ۴۶ اوور کې د ټولو لوبغاړو له سوځېدو وروسته ۲۲۰ منډې تر لاسه کړې.
جاوید احمدي او احسان الله د افغانستان له لوري لوبه پیل کړه. افغانستان د لوبې پیل سوکه او له احتیاطه ډک و. په لومړیو شپږو اوورنو کې ایله ۲۵ منډې جوړې شوې. ۱۱ اوور کې احسان الله جنت د ۲۰ منډو له جوړولو وروسته لومړۍ وېکټه له لاسه ورکړه.
جاوید احمدي بیا داسې حال کې خپله وېکټه له لاسه ورکړه، چې نیمه سلیزې ته یې ایله دوې منډې پاتې وې.
لوبډلمشر اصغر ستانکزی پر ۲۳ توپونو د ۱۲ منډو له جوړولو وروسته کیچ اوټ وسوځېد. شفیق الله شفق بیا له کومې منډې جوړولو پرته وسوځېد. د نوموړي پر ځای د ون ډاون پوزېشن لپاره ۲۴ کلن رحمت شاه زرمتی راغی.
نوموړی د ۳۲ منډو له جوړولو وروسته د این جي او براین له لوري له میدانه بهر شو. محمد نبي د ۲۹ منډو له سوځېدو وروسته وسوځېد او له هغه وروسته افغان لوبغاړي و نه توانېدل فشار له ځانه لرې کړي او یو په بل پسې له میدانه بهر شول.
په نننۍ لوبه کې د ایرلنډ له لوري خورا ښه ډګر ساتنه ولیدل شوه.
د دواړو لوبډلو تر منځ به درېیمه او وروستۍ یوه ورځنۍ لوبه د دسمبر پر ۱۰ د یکشنبې پر ورځ کېږي. د دغې لړۍ لومړۍ لوبه د دسمبر پر پنځمه نېټه افغانستان د ۱۳۸ منډو په توپیر ګټلې وه.
په هغه سيالۍ کې تجربه لرونکې افغان لوبغاړي لکه اصغر ستانکزی او محمد نبي ښه و نه ځلېدل، خو برعکس ناصر جمال او رحمت شاه ښه لوبه وکړه او په ترتيب سره يې ۵۳ او ۵۰ منډې جوړې کړې.