BBC
 شاته

ترکیه کې پر واده د خونړي برید وژل شویو شمېر ۵۰ ته ورسېد

Image copyright EPA

د ترکیې ولسمشر رجب طیب اردوغان د دغه هیواد په سوېلي ښار غازي عینتاب کې د کردانو د واده مراسمو کې د خونړي ځانمرګي برید مسوولیت پر اسلامي دولت (داعش) نومې ډلې اچولی.

د ترکیې چارواکو دا "ترهګریز" برید بللی او ویلي یې دي چې ښایي ځانمرګی برید وي.

د غازي عینتاب د والي دفتر ویلي، په دې برید کې د وژل شویو شمېر ۵۰ ته رسېدلی او نږدې سل نور کسان ټپیان دي.

شکمن ځانمرګي هغه مهال ځان ته چاودنه ورکړه چې د کردانو واده کې خلکو په کوڅه کې نڅا کوله.

غازي عینتاب د سوریې له پولې سره نږدې پروت ښار دی او په دغه سیمه کې د اسلامي دولت (داعش) نومې ډلې د فعالیت خبره کیږي.

د بي بي سي خبریال سریف ایسلر چې د غازي عینتاب اوسېدونکی دی وايي؛ د یو نیم میلیون خلکو دغه ښار لا د مخه هم په سوریه کې له پېښو اغېزمن و، ځکه چې اسلامي دولت هلته له کرد وسله والو سره لاس او ګرېوان دی.

Image copyright Reuters

تېره مۍ میاشت هم په غازي عینتاب کې په یوه ځانمرګي برید کې دوه پولیس ووژل شول چې فکر کېږي اسلامي دولت لخوا شوی وي.

د دې پېښې تر شا څوک دی؟ شنونکی مارک لوین بي بي سي استانبول

په غازي عینتاب کې د اسلامي دولت فعالیت

اسلامي دولت او کرد وسله والو تېر کال کې په ترکیه کې بریدونه وکړل. تېر جون په استانبول هوايي ډګر کې د اسلامي دولت په وروستي برید کې له څلوېښتو ډېر کسان ووژل شول.

دغو جهادیانو په وروستیو کې د سوریې په شمال کې د خپل مهم مرکز منبج په ګډون ډېرې سیمې له لاسه ور کړې، د سوریې وسله وال د اسلامي دولت تر کنټرول لاندې ولایت جارابلوس په لور د نور پرمختګ لپاره چمتو کیږي.

که دا ځانمرګی اسلامي دولت کړی وي، نو ګومان دا دی چې ځوابي برید یې وکړ او د خپلې دفاع لپاره یې یوه ننداره وړاندې کړي.

Image copyright EPA

په لیکلې بیانیه کې چې ترکي رسنیو خپره کړه، ولسمشر اردوغان ویلي: "د اسلامي دولت، د پي کې کې د کرد وسله والو او د امریکا مېشتي روحاني مشر فتح الله ګولن – ترکیه کې د تېرې میاشتې په کودتا تورن – د پلویانوترمنځ هیڅ توپیر نشته."

هغه زیاته کړې: "زموږ هیواد او زموږ ملت هغوی ته چې زموږ پرضد برید کوي، بیا یواځې دا پیغام ورکوي چې تاسو به بریالي نه شئ."

'هر لور ته وینې'

چاودنه د ښارګوټي په داسې سیمه کې شوې چې پر ډېرو زده کوونکو لرلو مشهوره ده او ډېرۍ وګړي یې کردان دي.

په سیمه کې د پارلمان غړي محمد طغرل رویټرز خبري اژانس ته ویلي، برید د کردانو په واده کې شوی دی.

د ښاغلي طغرل ګوند - د کرد ولس ډیموکراټ ګوند - ویلي چې واده د دوی د ډلې د یوه غړي و.

د ترکیې دوګان خبري اژانس وايي، زوم او ناوې په ختیځ کې په سیریت ښار کې د کردانو او امنیتي ځواکونو ترمنځ له جګړې تللي او غازي عینتاب کې مېشت شوي وو.

۲۵ کلن ولي کان وايي؛ "مراسم پای ته رسېدل چې د نڅاګرو په منځ کې چاودنه وشوه." "هرې خوا ته د خلکو د بدنونو ټوټې او وینې وې."

د شنبې په ورځ د ترکیې حکومت وویل چې د سوریې د کړکېچ د پایته رسولو لپاره به لا ډېر کارنده رول ولوبوي.

Image copyright STR

ترکیه کې پر ولسي وګړو وروستي خونړي بریدونه

د اګسټ ۲۰مه: په غازي عینتاب کې پر واده بمي برید لږ تر لږه ۳۰ کسان ووژل، مسوولیت یې په اسلامي دولت واچول شو

د جولای ۳۰ مه: د ترکیې پوځ ۳۵ کرد وسله وال ووژل چې د یوه پوځي مرکز لمنځه وړلو هڅه یې کوله

د جون ۲۹مه: په استانبول کې پر اتاتورک هواي ډګر په بمي برید او ډزو کې ۴۱ کسان ووژل شول. پړه یې پر داعش واچول شوه

د مارچ ۱۳مه: په انقره کې د کرد وسله والو په ځانمرګي برید کې ۳۷ کسان ووژل شول

د فبرورۍ ۱۷مه: انقره کې د پوځ پر کاروان برید ۲۸ کسان ووژل

د جنورۍ ۱۲مه: استانبول کې ځانمرګي برید کې د اتو جرمني سیلانیانو په ګډون لس کسان ووژل شول، د دې برید ګوته هم اسلامي دولت ته نیول کیږي

د ۲۰۱۵ اکتوبر: انقره کې د کوردانو پر سوله ییز لاریون په دوو ځانمرګو بریدونو کې له سلو ډېر کسان ووژل شول او دا په ترکیه کې تر ټولو مرګونی برید وو.