افغان چارواکي وايي د "خان اباد ولسوالۍ يې بېرته له طالبانو نيولې"
د افغانستان په شمال ختيځ کې دولتي چارواکي وايي چې د کندوز ښار په سوېل ختيځ کې يې د خان اباد والسوالۍ له وسله والو طالبانو بېرته نيولې ده.
د کندوز د والي اسدالله عمرخېل په وينا دغه ولسوالۍ يې له طالبانو نيولې او سيمې ته نوي راغلي ځواکونه به اوس د هغه سړک د پرانیستلو ته پام وکړي چې د دغه ولايت مرکز له ولسواليو سره نښلوي.
پوليس وايي د دغه ولسوالۍ مرکز، د ښار چوک او د امنيه قومندانی ودانۍ بېرته د دوی لاس ته لوېدلې ده.
خان اباد ولسوالۍ له څو ورځو جګړو او کلابندۍ وروسته نن سهار وسله والو طالبانو نيولې وه.
د پوليسو په وينا په جګړه کې وسله والو طالبانو ته ډېر زيان اوښتی خو طالبانو تراوسه په دې اړه څه نه دي ويلي.
د پوليسو د ۸۰۸ سپین زر زون قومندان شير عزيز کامه وال وايي، په سیمه کې ځینو هغو نا مسؤولو وسله والو سیمې ته د طالبانو د ننوتلو لپاره زمینه برابره کړې، چې ظاهراً د دولتي ځواکونو ترڅنګ د طالبانو پر ضد جنګېږي.
دی وايي، دغه ځواکونه پخپلو کې شخصي سیالۍ پالي، چې په لړ کې یې پر خان اباد ولسوالۍ وسله وال طالبان واکمن شول.
خو د خان اباد ولسوال حیات الله امیري بي بي سي ته وویل، له مرکز او تخاره یې څو ځلې د مرستې غوښتنه وکړه، خو غوښتنه یې جدي ونه ګڼل شوه او د ځواکونو د کمښت له کبله ولسوالۍ سقوط وکړ:
"موږ څو ځلې د مرستې غوښتنه وکړه، له تخار او کندوز نه هېچا مرسته راسره ونه کړه، بالاخره ولسوالۍ مو له لاسه ووتله. سیمه ییزو پاڅونوالو هم همکاري ونه کړه".
خان اباد د تخار کندوز پر لویه لار پرته ولسوالي ده، که طالبان پر خان اباد ولکه ټینګه کړي، د تخار او بدخشان لویه لار په خپله ولکه کې راوستلی شي.
د تېر ۲۰۱۵ کال سپتمبر په وروستیو کې وسله والو طالبان د کندوز ښار ځینو برخو ته ننوتل او بیا وروسته یې له درنې جګړې وروسته د لنډ وخت لپاره ښار ونیو.
افغان امنیتي چارواکو ویلي وو، طالبانو پر کندوز ښار له شاوخوا لسو خواوو هم مهاله بریدونه کړي وو.
کندوز د افغانستان په شمال کې نسبتاً نارامه ولایت دی. د ۲۰۱۵ کال سپتمبر پر لومړۍ نېټه په دغه ولایت کې دوو نفوذي طالبانو خپل ۱۴ ملګريووژل.
او د ۲۰۱۵ کال اګست کې د منځنۍ اسیا لپاره د جندالله مشر قاري غلام حضرت چې په ابو حذیفه مشهور و، په دې ولایت کې ووژلشو.