tolafghan.com
ټول افغان لومړي مخ ته

 ډېرځليزې پوښتنېډېرځليزې پوښتنې   لټونهلټونه   د غړو لستد غړو لست    کاروونکو ډله  کاروونکو ډله    د نوم ثبتولد نوم ثبتول 
 د پېژندنې څېرهد پېژندنې څېره    خپل شخصي پېغامونه وګورئ خپل شخصي پېغامونه وګورئ   ننوتنهننوتنه 

تعويذ يوه ساري ناروغي
پاڼي ته لاړ شئ 1, 2, 3, 4  مخکي
 
نوې موضوع پېل کړئ   موضوع ته ځواب ورکړئ    tolafghan.com دفورم سر ته   -> اسلام، اسلامي شرعه او د اسلام تاریخ
شاته موضوع وګورئ :: مخکې موضوع وګورئ  
ليکوال پيغام
وصيل پېروز
ستوري
ستوري


دغړيتوب نېټه: 20 فروري   2009
ليکنې: 342
ځای: زابل

ليکنهد ليکنې نېټه  : ١   شنبه اکتوبر   09, 2011 6:25 pm    عنوان   : تعويذ يوه ساري ناروغي Reply with quote

بسم الله الرحمن الرحيم
افغانان که له يوې خوا د جګړو او ګڼو نورو بدمرغيو ښکار ګرزېدلي نو له بل پلوه له تعليم ، پوهي او ديني پوهاوي هم دومره بې برخې شوي چي په هيڅ شمېرل کېدای شي .
د همدې بدمرغيو په لړ کي راته ملګري کيسه کوله چي زما مېرمنې ته د يو کوډګر له لوري ويل شوي وو چي ستا خاوند پر يوې بلې نجلۍ عاشق دی او هغې کوډي په کړې دي چي ستا د بقا لپاره خورا زيانمن دي او دې ته ورته نوري اوتې بوتې ...
کله چي دې ښځې د دې شيطان له خولې د شيطان دا رمزونه واورېدل نو په يوه ځل يې خپله پخواني ماضي هېره کړه او په کور کي يې يوه داسي تګلاره خپله کړه چي بالاخره د ښځې او مېړه تر منځ يو ځای ژوند تېرول سخت شول ، لنډه دا چي مېړه هم د خپلې ستونزې د حل په موخه يوه بل ملا ته رجوع وکړه ، ملاګل د موکې په موندلو نوموړي ته په ( ۲۴۰۰۰ ) دوه تعويذونه ور کښلي او ورته ويلي يې دي چي يو په کور او بل د مېرمنې په غاړه وځړوه چي ژر تر ژره به مشکل ختم شي مګر کيسه د دې برعکس شوه او خطر له ( ۵۰ ) فيصده ( ۱۰۰ ) فيصدۍ ته جګ شو.
اوس د نوموړي ژوند خورا په تريخ پړاو کي دی او هيڅ د دې ستونزې په حل نه پوهېږي ، کله چي يې له ما سره اړيکه ټينګه کړه نو هغه څه مي ورته وويل چي زما په اند حق دي او د دې کوډګرانو ، تعويذ کوونکو او شيطاني ملايانو له څېري مي پلو ورته پورته کړ ، نوموړي په خورا زورېدلې لهجه وويل چي دې ملا خو ما ته ويل چي تعويذ په قرآن ثابت دی او په سورة يوسف کي راغلي چي يعقوب عليه السلام يوسف عليه السلام ته تعويذ ور په غاړه کړ.
د نوموړي دې خبرې سخت حيران او هيجاني کړم ، د داسي شيطاني ملايانو په اړه مي د قرآن اياتونه يو په بل پسي د ذهن پر هنداره را څرګند شول .
الهي لارښوونه ده :
يَا أَيُّهَا الَّذِينَ آمَنُواْ إِنَّ كَثِيرًا مِّنَ الأَحْبَارِ وَالرُّهْبَانِ لَيَأْكُلُونَ أَمْوَالَ النَّاسِ بِالْبَاطِلِ وَيَصُدُّونَ عَن سَبِيلِ اللّهِ ( التوبه : ۳۴ )
ژباړه : اې مومنانو! بې شکه ډېر پيران او ملايان د خلکو مالونه په باطل يا ناروا ډول خوري او خلک د الله له لارې ګرزوي .
په رښتيا هم نن مي د دې الهي وينا تطبيق په عملي ډګر کي وليد او د دې شيطانانو له نورو نادودو هم خبر شوم .
وپوهېدم چي دې شيطانانو د خپلې خېټې او ... د ډکولو او ساتلو په خاطر کومو دسيسو ته لاس اچولی او غواړي خپلو دسيسو ته په څه ډول اسلامي رنګ ورکړي؟!!! .
دې ټګمارانو تل د تعويذ ، دم ، پيرۍ او مريدۍ په رمزونو هغه کړنې ترسره کړې چي په يوه عيسوي او بې دينه ټولنه کي يې هم د شتون احساس نه شي کېدای مګر دا هر څه زموږ په ټولنه کي د اسلام تر څنګ پېښېږي او نعوذ بالله د اسلام په نوم يې د جواز په لټه دي .
تعويذ يوه داسي ساري ناروغي ده چي له پاچا نيولې تر فقيره ټول په اخته دي او هر يو له دې لارې د خپلې بقا او ساتنې په اړه خورا حيرانوونکي اوهام يا هم عقائد لري يوه بېلګه به يې ولولو :
يو شمېر کانديدانو د تعويذ په وسيله پارلمان ته د تګ هڅه کړې
by محمدمنيرمهربان on Sep 30, 2010 - 12:07
کابل (پژواک د تلې ٧مه ٨٩): د ولسي جرګې ٨٣ کانديدان د کمپاين په دوره کې په کابل ښار کې يوه ملا ته تللي اود پيسو په بدل کې يې له هغه د برياليتوب لپاره د تعويذ غوښتنه کړې ده.
دغه ملا، چې د کابل ښار په تايمني واټ کې اوسېږي، په داسې حال چې د نوم له ښودلو يې ډډه وکړه، پژواک خبري اژانس ته وويل، چې د کانديدانو له ډلې ١٤ ښځې او نور نارينه معمولاً د ورځې په پاى کې هغه ته راتلل.
دغه ملا وويل، ٨٣ کانديدان چې هغه ته راغلي وو، ډېرى يې د کابل کانديدان وو او يو شمېر يې ان درې ځلي په دې موخه ده ته راغلي دي.
دغه ملا په داسې حال کې، چې د کوم ځانګړي کانديد نوم ياد نه کړ، وويل چې دغه کانديدان يواځې ددې لپاره ده ته راتلل، چې هغه د رياضي او روحانيت د علم له لارې لومړى هغوى ته معلومات ورکړي، چې ايا په ټاکنو کې به بريالى شي او که نه؟ او دوهم که وکړاى شي له هغوى سره په برياليتوب کې مرسته وکړي.
همدارنګه دې ملا زياته کړه، چې دى په خپل کور کې هره ورځ له څلور سوو څخه تر پنځو سوو پورې مراجعين لري، چې ډېرى يې ښځې دي. د هغه په وينا، کوم کانديدان چې ده ته راغلي دي، دده په روحاني شخصيت عقيده لري.
همدارنګه د کابل ښار يو بل ملا، چې ددې ښار په څلورمه ناحيه کې اوسېږي، د خپلو مراجعينو د ورځني نوملړ له مخې، پژواک ته وويل چې د ولسي جرګې ٩٢٨ کانديدان له ټول افغانستان څخه د کمپاين په ورځو کې ده ته راغلي او هغه ١٠٨ تنو ته د پيسو په بدل کې د برياليتوب تعويذ ورکړى دى.
دغه ٤٠ کلن ملا له دې امله، چې نه غواړي د کابل په سياسي –حکومتي ټولنه کې مشهور شي، د نوم له ښودلو ډډه وکړه، خو زياته يې کړه، چې هغه يواځې له کابل څخه ولسي جرګې ته له يوې کانديدې څخه ١٣زره ډالر اخيستي دي.
دا دوه ملايان په داسې حال کې پورتنۍ ادعاوې کوي، چې يو شمېر نورو کانديدانو د کمپاين په ورځو کې د خپلو پوسټرونو په خوا کې د هېواد د مذهبي او روحاني شخصيتونو انځورونه چاپ کړي وو.
يو له دې پوسټرونو څخه، چې دکابل په لوېديځ کې د اتحاد اسلامي د وتلي قوماندان زلمي توفان دى، د (مرچ اغا) په نامه د کندهار ولايت د يوه روحاني شخصيت انځور په خپل پوسټر کې کارولى و.
په دې پوسټر کې، مرچ اغا په داسې حال کې، چې سپينې جامې يې پر تن دي، پر جاى نماز ناست دى او لاسونه يې په دعا نيولي دي.
کله چې له زلمي توفان څخه پوښتنه وشوه، چې دى له مرچ اغا سره څه اړيکې لري او ولې يې په خپلو پوسټرونو کې د هغه له انځور څخه کار اخيستى دى؟ وويل: ((هر چند که سکندر زمانى –بى پير زمان مرو به خرابات.))
توفان زياته کړه چې د ملت کور خرابات نه دى، خو د هغه په اند، خرابات هغه څوک دى، چې د يتيم، کونډې او بې وزلو کسانو لاس ونيسي او د مظلومانو غوښتنې پوره کړي.
توفان وويل: ((مرچ اغا يو کاکه پير دى، ما د هغه دعا اخيستې او تردې ځايه رسېدلى يم.))
توفان زياته کړه، چې هغه يواځې د مرچ اغا له دعا څخه کار اخيستى دى، نه د هغه له مذهبي واک څخه.
نوموړي وويل، چې هغه په خپلو شخصي پيسو د کابل ښار په کمپنۍ سيمه کې د مرچ اغا لپاره په نيم جريب ځمکه کې کور او مېلمستون جوړ کړى دى.
دا چې ملايان او روحاني کسان په کابل ښار کې له خپلو مراجعينو سره کومې ژمنې کوي او تر کومه بريده د خپلو ژمنو پر پلي کولو ټينګ دي، بېلابېل نظريات موجود دي.
له کابل ښار څخه ولسي جرګې ته نوماند فهيم کوهدامني، چې مخکې يې په امروز ټلويزيوني شبکه کې د (بيا و ببين) خپرونه پرمخ بېوله، پژواک ته وويل، چې د ټولنې په روحاني او مذهبي کسانو نيوکه لري، چې ولې يې تراوسه د ملا، جادوګر، فالبين او رمال ترمنځ توپير نه دى کړى.
کوهدامني زياته کړه: ((د خواشينۍ ځاى دى، چې زموږ په ټولنه کې جادوګر، فالبين او رمال د ملا په نامه يادېږي.))
کوهدامني د (بيا و ببين) په خپرونه کې د خپلو تجربو له مخې وويل، چې دکابل ښاريان، ډېرى وختونه د بخت د خلاصولو، د درد تسکين، د ورکو شويو کسانو د موندلو، د هلک او نجلۍ دکوژدې کولو او يو شمېرکانديدان ان په ټاکنو کې د برياليتوب لپاره ملا او فالبين ته ورځي.
له کابل څخه ولسي جرګې ته نوماندې روبينا جلالي وويل، چې هغه په نذر او زيارت عقيده لري او له همدې امله دکمپاين په ورځو کې هره چهارشنبه د کابل ښار په مرادخواني کې د (ابوالفضل) زيارت ته تله او دعا يې کوله، څو خداى پاک يې د (ابوالفضل) په روى د خلکو په منځ کې خجالته نه کړي.
جلالي زياته کړه، چې د ملا په وجود کې دا وړتيا نشته، څو د ولسي جرګې يو کانديد په ټاکنو کې بريالى کړي.
روبينا وويل: ((که چېرې ملا دومره توان لري، نو ولې له خپل ځان نه د پارلمان وکيل نه جوړوي.))
کله چې پژواک دغه موضوع له کابل څخه دغې جرګې ته له يوې بلې نوماندې شکريې بارکزۍ سره شريکه کړه، هغې وويل: ((په فردي قضاوتونو باور نه لرم.))
د بارکزۍ په وينا، هغې د کمپاين په ورځو کې څو ځلي هم ختم کړى او هم استخاره؛ خو ددې لپاره يې نه دى کړى، چې د پارلمان څوکۍ ترلاسه کړي.
بارکزۍ زياته کړه: ((زه په جادو او سحر عقيده نه لرم او يواځې مې د خپلو خلکو د نېکمرغۍ لپاره استخاره وکړه. ))
ديني عالمان، د فال کتلو او تعويذ ليکلو موضوع د اسلام له نظره ناروا بولي او وايي، چې اسلام د خرافاتو او فال ليدلو دين نه دى.
د پرتليزو حقوقو ډاکټر سيد ابوبکر متقي، چې ٢٢ ټوکه کتابونه يې د پرتليزو حقوقو په مسايلو کې ليکلي دي، پژواک ته وويل، چې فال کتل او تعويذ ليکل د شيطان عمل دى او تعويذ ليکونکى او تعويذ اخيستونکى دواړه ګنهکاران دي.
متقي وويل: ((د غيب کيليانې له الله تعالى سره دي او له هغه پرته بل څوک نه پوهېږي.))
متقي زياته کړه، چې حضرت محمد صلى الله عليه وسلم فرمايي: ((څوک چې تعويذ ورکوي او څوک چې تعويذ ليکونکي ته ورځي، وېرېږم چې ځاى به يې په دوزخ کې وي.))
متقي ددې پړه، چې ګويا د ولسي جرګې يو شمېر نوماندان د برياليتوب لپاره تعويذ ليکونکيو ته ورځي، د افغانستان په اوسني حکومت واچوله او ويې ويل، که چېرې په يوه ملک کې اسلامي نظام په سمه توګه پلى شي، نو وبه نه شو کړاى چې تعويذ ليکونکى په کې پيدا کړو.
دا له پژواک ډاټ کام څخه اخيستل شوی دی
http://www.pajhwok.com/dr/node/113499
( سرچينه : پژواک ډاټ کام )
دې ساري ناروغۍ ( تعويذ) اوس زموږ په ټولنه کي دومره رېښې کړې چي له ولس مشره نيولې ، تر چارواکي او فقيره ټول په اخته دي ، هر يو له دې لارې غواړي خپل هدف ته ځان ورسوي مګر نه پوهېږي چي دا يوه داسي کرغېړنه او ناروا لاره ده چي نه له شرعي پلوه او نه هم له اخلاقي پلوه د منلو وړ دی بلکي د هغه سراب په شان دی چي له لرې اوبه ښکاري خو تندې اخيستی هيڅکله خپله تنده پرې نه شي خړوبولای او که هر څومره منډې ترړې وکړي نو له ډېري لالهاندۍ پرته به هيڅ ونه مومي . د ژوند د ستونزو مخنيوی عملي لارې چارې غواړي چي د پوهي او واقعي علم پر بنسټ رامنځ ته کېدای شي ، نه د پالونو ، تعويذونو او کوډو په وسيله . دا هغه چارې دي چي له حقيقي علومو لرې په خيالونو او افسانو کي ډوب خلک لاسونه ور اچوي ، نه هغه څوک چي د واقعيتونو په پېژندلو د ژوند د بېلابېلو اړخونو مشکلات او ناخوالې داسي حل کوي چي هم دين اجازه ورکوي او هم بشري علوم .
که مي وخت وموند ان شاء الله د تعويذ د شرعي حيثيت په اړه به هم د اسلامي اساساتو په رڼا کي معلومات سره شريک کړو.
په مينه او درنښت
بېرته سر ته
د کارونکي عکس وښاياست شخصي پېغام وليږئ بريښناليک ولېږئ AIM Address Yahoo Messenger
ع کريم حليمي
ستوري
ستوري


دغړيتوب نېټه: 10 جنوري   2004
ليکنې: 2679
ځای: new york

ليکنهد ليکنې نېټه  : ١   شنبه اکتوبر   16, 2011 12:39 pm    عنوان   : Reply with quote

انسانان داسي یو ژوندي مخلوق دي چه د فکر ، ادراک او احساس خاوندان دي ، بعضي وخت له داسي یو کیفیت او د زحمت د حالت سره مخ کیږي ، او علاج ته ضرورت لري ، د انسان رحمتونه درېٖ قسمه وي او دغه دری کلاسه رحمتونوڅخه هر کلاس يې په زرهاوو اقسام لري

اقتصادي
جسماني
روحي

زه تر نورو زحمتونو ګام اړوم ، راځم د جسماني ناروغۍ و زحمت ته
هر وخت چه د ناروغی له پاره يې دوا نه وي نو د جسماني ناروغی د نه علاج په سبب په روحي تشویش هم اخته وي ، کله چه تشویش ورپېښ شي
نو د د جسم دننه دفاعي immune system سیسټم يې هم ، دا امکان سته چه کمزورئ شي ، او self healing سیسټم يې هم برهم او درهم
شي ، په غریب ملکونو کښي خلګ مجبوره دي د دم او چف او تعویذ څخه استفاده وکړي چه self healing دستګاه ئې کمزورئ نه شي

په غربي جهان کښی هم داسي پېښېږي چه ډاکتران د یوه سړي د زحمت
او مرض علاج ته دوا نه لری ، نو ډاکتر و داسي یو مریض ته placebo
ګولۍ ور وفرمائې او اکثره وخت يې د placebo په دوا علاج وشي

تعویذ د placebo په ډول استعمالول روا کار عمل دي
ولي چه په طبي علاج کښي حسابیږي

درنښت
بېرته سر ته
د کارونکي عکس وښاياست شخصي پېغام وليږئ بريښناليک ولېږئ
..Ahmadzai
ستوري
ستوري


دغړيتوب نېټه: 07 جنوري   2008
ليکنې: 484

ليکنهد ليکنې نېټه  : ١   شنبه اکتوبر   16, 2011 3:54 pm    عنوان   : Reply with quote

ع کريم حليمي ليکلي:
انسانان داسي یو ژوندي مخلوق دي چه د فکر ، ادراک او احساس خاوندان دي ، بعضي وخت له داسي یو کیفیت او د زحمت د حالت سره مخ کیږي ، او علاج ته ضرورت لري ، د انسان رحمتونه درېٖ قسمه وي او دغه دری کلاسه رحمتونوڅخه هر کلاس يې په زرهاوو اقسام لري

اقتصادي
جسماني
روحي

زه تر نورو زحمتونو ګام اړوم ، راځم د جسماني ناروغۍ و زحمت ته
هر وخت چه د ناروغی له پاره يې دوا نه وي نو د جسماني ناروغی د نه علاج په سبب په روحي تشویش هم اخته وي ، کله چه تشویش ورپېښ شي
نو د د جسم دننه دفاعي immune system سیسټم يې هم ، دا امکان سته چه کمزورئ شي ، او self healing سیسټم يې هم برهم او درهم
شي ، په غریب ملکونو کښي خلګ مجبوره دي د دم او چف او تعویذ څخه استفاده وکړي چه self healing دستګاه ئې کمزورئ نه شي

په غربي جهان کښی هم داسي پېښېږي چه ډاکتران د یوه سړي د زحمت
او مرض علاج ته دوا نه لری ، نو ډاکتر و داسي یو مریض ته placebo
ګولۍ ور وفرمائې او اکثره وخت يې د placebo په دوا علاج وشي

تعویذ د placebo په ډول استعمالول روا کار عمل دي
ولي چه په طبي علاج کښي حسابیږي

درنښت



وصیل صاحب هغوی خو به جاهلان وي، خو حیران دغه متمدن متمرکن مفتی صاحب ته سوم، څومره تیارې فتواګانې لري، د الله تعالی په سپیڅلي دین باندې په پټو سترګو وروان دی، څه چې یې زړه غواړي أو په خپل ناقص منطق ورته برابر ښکاري، هغه ورته دین ښکاري، أو د حلال وحرام ټاپې یې جب کې ساتلي، د Placebo therapy لپاره شرک أو کفر هم جایز ګڼي.

الله تعالی دې نور ورته هدایت وکړي....آمین
بېرته سر ته
د کارونکي عکس وښاياست شخصي پېغام وليږئ
ع کريم حليمي
ستوري
ستوري


دغړيتوب نېټه: 10 جنوري   2004
ليکنې: 2679
ځای: new york

ليکنهد ليکنې نېټه  : ١   شنبه اکتوبر   16, 2011 5:34 pm    عنوان   : Reply with quote

اقتباس:
الله تعالی دې نور ورته هدایت وکړي....آمین

ثم امین
زه هم دغه یو متمرکن ته په فکر کي ډوب تللی یم ، ولي ؟؟؟؟؟‌ د انتحار او قتل النفس فتوا مي ورکړه کاپر شولم ؟؟؟ بیخي روا ده چه اسما حسنی پر کاغذ ولیکې او په چرم ئې پوښ کړېٖ په غاړه يې کړېٖ ، ایا له فضیلت څخه ئې پښېمانه ئې ؟ نن خلک انتحار روا کوي !!!!!
بېرته سر ته
د کارونکي عکس وښاياست شخصي پېغام وليږئ بريښناليک ولېږئ
وصيل پېروز
ستوري
ستوري


دغړيتوب نېټه: 20 فروري   2009
ليکنې: 342
ځای: زابل

ليکنهد ليکنې نېټه  : ١   شنبه اکتوبر   16, 2011 6:54 pm    عنوان   : Reply with quote

د بحث ټولو ګډونوالو ته سلامونه
روغتيا مو غواړم
ع کريم حليمي ليکلي:

انسانان داسي یو ژوندي مخلوق دي چه د فکر ، ادراک او احساس خاوندان دي ، بعضي وخت له داسي یو کیفیت او د زحمت د حالت سره مخ کیږي ، او علاج ته ضرورت لري ، د انسان رحمتونه درېٖ قسمه وي او دغه دری کلاسه رحمتونوڅخه هر کلاس يې په زرهاوو اقسام لري

اقتصادي
جسماني
روحي

دا چي تاسو د انساني ناروغيو يا انساني ستونزو په اړه يوه لنډه تشرېح ليکلې دا کولای شي چي زموږ د بحث اصل موضوع نوره هم روښانه کړي .
ع کريم حليمي ليکلي:

زه تر نورو زحمتونو ګام اړوم ، راځم د جسماني ناروغۍ و زحمت ته
هر وخت چه د ناروغی له پاره يې دوا نه وي نو د جسماني ناروغی د نه علاج په سبب په روحي تشویش هم اخته وي ، کله چه تشویش ورپېښ شي
نو د د جسم دننه دفاعي immune system سیسټم يې هم ، دا امکان سته چه کمزورئ شي ، او self healing سیسټم يې هم برهم او درهم
شي ، په غریب ملکونو کښي خلګ مجبوره دي د دم او چف او تعویذ څخه استفاده وکړي چه self healing دستګاه ئې کمزورئ نه شي

که په لنډو ووايم له دې اوږدې مقدمې وروسته ستاسو هدف د تعويذ او دم صحيح ثابتول دي په دې اړه بايد زه يو څو پيليزې کرښې وليکم .
تعويذ يو غير اسلامي کار او کړنه ده چي په اسلام کي يې د پيغمبر په خوله منعه راغلې ده ، تعويذ نه يوازي دا چي د ناروغيو درمل نه شي کېدای بلکي د ناروغيو ، مصيبتونو ، کړاوونو او مشکلاتو زېږنده ده ، تعويذ نه يوازي دا چي په ټولنه کي د ستونزو او ناخوالو ور پرانيزي بلکي خلک له توحيد ، صحيح اسلام او سالمې عقيدې شرک ، کفر او بدعت ته وباسي . په لنډو دومره ويلای شم چي تعويذ يو غير اسلامي کار دی چي په اسلام کي هيڅ شرعي ثبوت نه لري دا چي ننۍ مسلمانه ټولنه په دې رنځ اخته شوې يو مهم لامل يې له دينه لرې والی او له قرآ ن و صحيح احاديثو سره نا اشنايي ده .
پاتي شو دم ، دم په صحيح احاديثو ثابت دی مګر نه په دې ډول لکه په نننۍ مسلمانه ټولنه کي چي دود دی ، هر مسلمان کولای شي دم وکړي او په حديثو کي ښودل شوې دعاوې د ښودل شويو ناروغيو لپاره استعمال کړې له دې هاخوا له ځانه دمونه جوړول او د ډول – ډول ناروغيو لپاره يې اختصاص نه دا چي دوکه ، چل او فريب دی بلکي دا خلک په ډېر بې رحمانه ډول د سالمې اسلامي عقيدې د ختمولو هڅه کوي . د دې خلکو دا ډول کړنې نه يوازي چي د اسلام برخه نه شي بلل کېدای بلکي غير اسلامي اعمال او ناثابتې چارې دي .
ع کريم حليمي ليکلي:

په غربي جهان کښی هم داسي پېښېږي چه ډاکتران د یوه سړي د زحمت
او مرض علاج ته دوا نه لری ، نو ډاکتر و داسي یو مریض ته placebo
ګولۍ ور وفرمائې او اکثره وخت يې د placebo په دوا علاج وشي

تعویذ د placebo په ډول استعمالول روا کار عمل دي
ولي چه په طبي علاج کښي حسابیږي

درنښت

له الهي لارښوونې سره سم رسول الله صلی الله عليه وسلم زموږ لپاره غوره نمونه او بېلګه ده ، موږ هغه څه کوو او هغه څه منو چي په اسلامي اساساتو کي د جواز سند ولري له دې هاخوا ټولو چارو ته په مردود نظر ګورو او له کولو يې ځان ساتو . تعويذ هم د هغو چارو په نوملړ کي ځاييږي چي نه يوازي له منلو يې ډډه کوو بلکي په کلکه يې غندو او ردوو يې ځکه زموږ لپاره دا نبوي لارښوونه د يوې ډېوې حيثيت لري :
لکل داء دواء . ( صحيح البخاري )
ژباړه : هر مرض دوا لري .
دا نبوي وينا موږ ته په صراحت وايي چي هره ناروغي درمل او علاج لري ، هيڅ داسي ناروغي نه شته چي علاج ونه لري مګر هو له نبوي فرمان سره سم يوازي بوډاتوب هغه ناروغي ده چي هيڅ علاج یې نه شته . له همدې کبله موږ تل د تعويذونو ، بې ځايه چوف او توف پر ځای له نبوي تګلارې سره سم پر دارو درمل اکتفا کوو.
وړاندي تر دې چي د دې نظريې د مخالف لوري خبرو ته راشم بايد واضحه کړم چي تعويذ ولي غير اسلامي عمل او کړنه ده؟.
راشئ په دې اړه يو لړ نبوي ويناوې ولولو او نن د دې حقيقت له مخ پلو پورته کړو ، وپوهېږو چي زموږ په ټولنه کي دا دود عمل تر کومه ځايه د اسلام او پيغمبر له لارښوونو سره سمون خوري؟.
يو څو حديثونو ته مو پام غواړم :
( ان الرقی والتمائم والتولة شرک ) ( مشکوة ، حديث صحيح )
ژباړه : بې شکه دم ، تعويذونه او د مينې تعويذونه شرک دي .
دلته بايد ووايم چي وروسته په ثابتو دعاوو او قرآني اياتونو د دم کولو جواز ورکول شوی دی مګر د تعويذ کولو او ځړولو هیڅ صحيح لاسوند نه شته .
( من تعلق شيئا وکل اليه ) ( ترمذي مع تحفة الاحوذي ۳ / ۱۷۱ ، حديث صحيح )
ژباړه : چا چي يو شی وځړاوی هغه ته به وسپارل شي .
يعني چا چي په هر هدف په ځان پوري يو شی وځړاوی تعويذ وي که هره بلا الله يې له ساتنې لاس اخلي او مرسته يې هماغه شي ته سپاري چي ده باور پرې کړی او په ځان يې ځړولی دی .
په دې اړه نور ګڼ شمېر احاديث هم تر لاسه کېدای شي مګر اوس د وخت د کموالي له کبله نه شم کولای چي ټول راوړم خو له اړتيا سره سم به ان شاء الله په دې اړه مفصله ليکنه وکړم څو حقيقت خلکو ته په حقيقي بڼه څرګند شي .
هغه ښاغلي چي تعويذ يوه اسلامي او روا چاره بولي هغوئ بايد لومړی له قرآن او حديثو څخه په صحيح سند د دوئ د دې فعل لپاره د جواز سند پيش کړي ځکه موږ په دې اړه فيصله يوازي نبي او الله ته سپارو چي د الله نبي موږ له دې کاره منعه کوي ، له همدې لارښوونې سره سم موږ تعويذ يوه غيره اسلامي کړنه او ناجائز عمل بولو.
د تعويذ د چارې مشروع کوونکي بايد په کره لاسوندونو د خپل دې کار لپاره د جواز ثبوت وړاندي کړي مګر هو ! د جواز ثبوت بايد يوازي له قرآن او صحيح حديث څخه وړاندي کړي نه داچي د ملايانو خبرې او خپل خيالي نظريات د دلايلو په توګه وړاندي کړي .
بېرته سر ته
د کارونکي عکس وښاياست شخصي پېغام وليږئ بريښناليک ولېږئ AIM Address Yahoo Messenger
عادل عادل
ستوري
ستوري


دغړيتوب نېټه: 24 مارچ   2008
ليکنې: 1289

ليکنهد ليکنې نېټه  : ١   شنبه اکتوبر   16, 2011 8:24 pm    عنوان   : Reply with quote

السلام علیکم

محترم معزز وصیل پېروز صاحب،،، تاسو لومړی باید تعویذونه تفکیک کړی،،، هغه تعویذات په رښتیا هم ښه نه دي چې د بدوح دایرې پکې کاږي،،، حساب کتاب پکې لیکي،،، یا خو عاشق ته پې خپله معشوقه حاضروي،،،،

دا چې تاسو په مطلق ډول تعویذ شرک ګڼی نو په دې صورت کې د هغو قراني ایاتونو سره زیاتی کوی چې په کاغذ کې لیکل کیژي او بیا خو یا په جیب، مټ یا غاړه کې ټینګیژي او یا هم د څاښت په توګه په اوبو کې څښل کیژي،،، نن سبا خلک ټول قران کریم په چرم پوښ او د یوه نسبتا غټ تعویذ په بڼه په جیبونو کې ګرزوي،،، تقبیل یا ښکلول یې بل غم دی چې تاسو یې بدعت ګڼی.

هدف مې دا دی چې په خپلو فتواوو کې یو څه استثنااتو ته قایل شی،،،

زه مو ټولې لیکنې ښه په مینه لولم خو په خدای چې تاسو کله هم د خپلو خبرو په ترڅ کې چېرته ،،،، والله اعلم،،،، نه لیکی،،، په عقیدتي مسایلو کې په دې کچه ډاډ او استغنا هم ستاسو د ډول وهمي شرکیاتو ته پاتې کیژي.

ګستاخي معاف کړی،،، قربان مو شم
بېرته سر ته
د کارونکي عکس وښاياست شخصي پېغام وليږئ
ع کريم حليمي
ستوري
ستوري


دغړيتوب نېټه: 10 جنوري   2004
ليکنې: 2679
ځای: new york

ليکنهد ليکنې نېټه  : ٢   شنبه   اکتوبر   17, 2011 12:18 am    عنوان   : Reply with quote

هر د سالم عقل خاوند که و جادوګر ، او کوډګر تعویذ ته پناه وړي
جادوګر او کوډګر او پناه ور وړونکئ ټول د کفر په درشل کښي ودرېدل !!!

او هر د سالم عقل خاوند او د ایمان خاوند چه الآية 255 د سورة البقرة
پر کاغذ ولیکي او په چرم کښي ئې پوښ‌ کړي او له ځان سره ئې ګرځوي او یا ئې د صدرۍ په کالر کي وګنډي ، نه ئې بد اخلاقي بللئ شو او نه بدعت

که دغه کار ته کوم څوک بد اخلاقي او بدعت وايي ، نو دئ پخپله د‌ تر پولي‌
اوښتئ دی


زه د هر حسن کار له پاره خلګ هڅوم ، سند مي :
والمؤمنون والمؤمنات بعضهم أولياء بعض يأمرون بالمعروف ......

درنو ترجمانانو ته پر ترجمو سربېره پوهه هم ضرور ده ، نه پوهیږم چه د بعضو ژباړنانو پوهي هیڅ جوش نه وي خوړلي فکر کوي چه عربي او E ئې
زده کړه ، ژباړه کولی شي ، نو فکر کوي چه عالم هم شوو ، اما داسي نده

څه د طب ، څه د نجوم ، څه د کیمیا ، څه د ریاضي ، څه د الجبر ، څه د فزیک ،........... څه درسره شته

احمقه ټولنه: نه شفاخانه لري ، نه دوا لري ، نه علم
او سور خولئ جارچي نعرې وهی چه تعویذونه مکوئ ، او لاد ئې مریض دی
لاس تر زنه نه کښېني ، د تعویذ خیار کښي څشي‌ ورته لریٖٖٖٖٖٖ ؟؟

نبی چه خلکو ته ویل چه په ځان ډبري مه ځړوئ ، که شفاخانه یې نه درلوده
معجزه یې درلودله ، چه څوک به ورته راغله چه مریض یم ، د اوښي متیازي
يې ور فرمایلې ،


داچه معجزه درسره نشته ، شفاخانه او دوا خو مادي شئ باید وېلرې
دا راته وایه : چه دا دوا او طبیب ولي نه لرې ؟؟؟؟

دوا او شفاخنه او طبیبان مدرسې تر هر کلی ور ورسوه ، نو به د کوډګر او جادوګر دوکانداري ور ختم کړې ، او بس

Placebo څخه کار اخستل پناه ور وړل نه دي ، پلسیبو سبب دئ
قال تعالي (وجعلنا لكل شئ سببا )
بېرته سر ته
د کارونکي عکس وښاياست شخصي پېغام وليږئ بريښناليک ولېږئ
وزیري
ستوري
ستوري


دغړيتوب نېټه: 11 اکتوبر   2010
ليکنې: 496

ليکنهد ليکنې نېټه  : ٢   شنبه   اکتوبر   17, 2011 3:20 am    عنوان   : Reply with quote

ټولو وروڼو ته السلام علیکم ورحمة الله وبرکاته:

زه په دی نه پوهیږم چی له حضرت محمد صلی الله علیه وسلم نه رانیولی تر ننه پوری دا مذهبی علماء، مفسرین، محدثین او فقهاء نه پوهیدل چی په خپلو کتابونو کی یی دی شیانو ته ځای ورکړی او ستایلي دی او که دا نن سبا ددی حدیث مصداق (یخْرُجُ نَاسٌ مِنْ قِبَلِ الْمَشْرِقِ وَیَقْرَءُونَ الْقُرْآنَ لاَ یُجَاوِزُ تَرَاقِیَهُمْ، یَمْرُقُونَ مِنَ الدِّینِ كَمَا یَمْرُقُ السَّهْمُ مِنَ الرَّمِیَّةِ، ثُمَّ لاَ یَعُودُونَ فِیهِ حَتَّى یَعُودَ السَّهْمُ إِلَى فُوقِهِ) نه پوهیږی.

دا خو یو واضح حقیقت دی چی هغه تعویذ په کوم کی چی شرکیه الفاظ لیکل شوی وی مطلقا ناروا عمل ده. او هغه تعویذ په کوم کی چی اسماء الله الحسنی لیکل شوی وی او په خپله تعویذ حقیقی مؤثر ونه ګڼل شی روا او نیک عمل ده. دا خبره می له خیټي ونه لیکله بلکی دی کتابونو وویلی:
مرقات شرح المشکاة، ص:۳۲۱ او ۳۲۲، ج۸، الترغیب والترهیب، ج۵ ص۲۷۱، ابوداوٴد شریف، ج۲، ص۹۲، الفتاویٰ رد المحتار، ج۵ ص۲۳۲

اوس به راشم دیته چی وصیل پیروز ورور له مشکوة شریف نه یو حدیث را اخیستئ ده چی رسول الله صلی الله علیه وسلم فرمایلی دیSad ان الرقی والتمائم والتولة شرک).
پیروزه وروره! که چیرته دوه حدیث د یو او بل په مقابله کی واقع شی نو څه فکر به کوی چی نعوذباالله رسول الله صلی الله علیه وسلم غلط شوی او که ستا فهم کم دی؟ ستا په ځواب خو نه پوهیږم خو زما فهم دا وایی چی ته به غلط شوی یی.
په کوم حدیث کی چی تا الرقی ناروا شمارلی هغه نه مراد هغه تعویذات دی چی شرکیه الفاظ ولری. له دی نه هغه تعویذات مراد نه دی چی په اسماء الله الحسنی لیکل شوی وی. دلیل یی د ابوداؤد شریف دا حدیث ده:
عن عوف بن مالک قال کنا نرقی فی الجاهلیة فقلنا یا رسول الله صلی الله علیه وسلم کیف تری فی ذلک فقال اعرضوا علی رقاکم لا باس بالرقی ما لم تکن شرکا. (ابوداؤد، جلد دوم، صفحه ۱۸۶)

په حدیث پوه علماء بیا داسی لیکی:

اول: ردالمحتار: صفحه ۳۶۳.
ولا باس بالمعاذات اذا کتب فیها القرآن او اسماء الله تعالی. و انما تکره العوذة اذا کانت بغیر لسان العرب، ولا یدری ما هو و لعله یدخله سحر.
دوهم: وفی شرح المسلم للنوی: اما الرقی بآیات القرآن و باالاذکار المعروفة فلا نهی فیه بل هو السنة ..... و قد نقلوا الاجماع علی جواز الرقی بکتاب الله تعالی و بذکره و منهی عنها اذا کانت باللغة العجمیة او بما لا یدری معنا لجواز ای یکون فیه کفرا. (دوهم جلد، صفحه ۲۱۹)
دریم: و فی فتح الباری: عن ابن مسعود رضی الله عنه ان النبی صلی الله علیه وسلم کان یکره عشر خصال فذکر فیها الرقی الا بالمعوذات و قال بعد اسطر وقد اجمع العلماء علی جواز الرقی عند اجتماع ثلثة شروط ان یکون بکلام الله تعالی او باسمائه وصفاته و باللسان العربی او بما یعرف معناه من غیره وان یعتقد ان الرقیة لا تؤثر بذاتها بل بذات الله تعالی و قال بعدا سطر فی حدیث عوف بن مالک اعرضوا علی رقاکم لاباس بالرقی ما لم یکن فیه شرک. (لسم جلد، صفحه ۲۳۹)
څلورم: و فی المشکوة: عن انس رضی الله عنه قال رخص رسول الله صلی الله علیه وسلم فی الرقیة من العین و الحمة والنمله. (صفحه ۳۸۷)
پنځم: و فی المرقاة: و لا یکره منها ما کان علی خلاف ذالک کالتعوذ بالقرآن و اسماؤ الله تعالی (جلد اتم، صفحه ۳۰۲)

نو پیروز جانه! ستا احادیث او آیاتونه ټول صحیح دی خو ستا فهم کی یوڅه کمی شته، مذهبی عالم ته کینه چی په دین دی پوه کړی او له دی خوارجي عقیدو نه دی وساتی.

والسلام
بېرته سر ته
د کارونکي عکس وښاياست شخصي پېغام وليږئ
-
ستوري
ستوري


دغړيتوب نېټه: 06 ميئ   2011
ليکنې: 349

ليکنهد ليکنې نېټه  : ٢   شنبه   اکتوبر   17, 2011 3:42 am    عنوان   : Reply with quote

م . وصیل پېروز صیب د تعویذ په حکم کې به دومره تشدید هم نه وي راغلی لکه تاسو چې یې کوئ. ستاسو د ذکر کړی حدیث (ان الرقی والتمائم والتولة شرک) څخه ځینو علماوو (قرآني تعویذات) مستثنی ګرځولي دي.

خو هغه علماء چې دواړه تعویذات ناروا ګڼي، په هغوی کې هم ټول علماء په پورتني حدیث استدلال نه کوي، بلکې یوه ډله د مذکور حدیث ظاهر ته ګوري او هر تعویذ ناجایز ګڼي خو بله ډله قرآني تعویذات د (سدا للذریعة) له مخې جایز نه بولي، اعني که قرآني تعویذاتو ته جواز ورکول شي بیا به د خلکو پرمخ دوازه خلاصه شي او د جایز او ناجیز توپیر به له منځه لاړ شی. یو دا، او بل دا چې خلک به یې د اودس ماتي په وخت کې له ځانه نه جدا کوي او د قرآني ایتونو بې عزتي به رامنځته شي.
نه دا چې د شرک او بدعت پخاطر یې ناروا کړي لکه څنګه چې تاسو پرې ټینګار کوئ.

وزیري صیب زما او ستا لیکنې همزمان تیرې شوي، زما خبرې تاسو ښې شرحه کړي دي.
بېرته سر ته
د کارونکي عکس وښاياست شخصي پېغام وليږئ
وزیري
ستوري
ستوري


دغړيتوب نېټه: 11 اکتوبر   2010
ليکنې: 496

ليکنهد ليکنې نېټه  : ٢   شنبه   اکتوبر   17, 2011 4:38 am    عنوان   : Reply with quote

کلیوال صیب تاسی لیکلی:
اعني که قرآني تعویذاتو ته جواز ورکول شي بیا به د خلکو پرمخ دوازه خلاصه شي او د جایز او ناجیز توپیر به له منځه لاړ شی. یو دا، او بل دا چې خلک به یې د اودس ماتي په وخت کې له ځانه نه جدا کوي او د قرآني ایتونو بې عزتي به رامنځته شي.

په دی باندی به زه صرف دومره ووایم چی زمونږ په بی باکی باندی باید یو اسلامی امر له منځه ونه باسو. شریعت خپله خبره واضح کړیده.
رقیة في غلاف متجاف لم یکرہ دخول الخلاء بہ والاحتراز أفضل وفي الشامی: الظاھر ان المراد بھا ما یسمونہ الآن بالھیکل والحمائل المشتمل علی الآیات القرآنیة فإذا کان غلافہ منفصلاً عنہ کالمشمع ونحوہ جاز دخول الخلاء بہ․ (شامي: ۱/۳۲۱، ط زکریا دیوبند)

والسلام
بېرته سر ته
د کارونکي عکس وښاياست شخصي پېغام وليږئ
-
ستوري
ستوري


دغړيتوب نېټه: 06 ميئ   2011
ليکنې: 349

ليکنهد ليکنې نېټه  : ٢   شنبه   اکتوبر   17, 2011 9:46 am    عنوان   : Reply with quote

وزیري صیب هغه زما نظر نه دی ،د هغې نه زما مطلب دا وه چې هغه څوک چې قرآني تعویذاتو ته په جواز ندي قائل، هم یوه ډله پکې داسې شته چې د (سدا للذریعه) پر بنیاد قرآني تعویذ ته جواز نه ورکوي، او غوښتل مې م . وصیل پېروز صیب ته واضحه کړم چې د هغو خلکو فیصدي څومره لږ ده کوم چې د قرآني تعویذ په تحریم کې (علة) ، شرک ګڼي. نو پېروز صیب پکې باید ډیر تشدد ونکړي.
هیله ده اوس زما په مطلب پوهیدلي وئ.
بېرته سر ته
د کارونکي عکس وښاياست شخصي پېغام وليږئ
وزیري
ستوري
ستوري


دغړيتوب نېټه: 11 اکتوبر   2010
ليکنې: 496

ليکنهد ليکنې نېټه  : ٢   شنبه   اکتوبر   17, 2011 10:31 am    عنوان   : Reply with quote

کلیوال صیب، ستا په مطلب باندی وپوهیدم. بښنه غواړم که د ازار سبب درته ګرځیدلی یم.
بېرته سر ته
د کارونکي عکس وښاياست شخصي پېغام وليږئ
وصيل پېروز
ستوري
ستوري


دغړيتوب نېټه: 20 فروري   2009
ليکنې: 342
ځای: زابل

ليکنهد ليکنې نېټه  : ٢   شنبه   اکتوبر   17, 2011 5:55 pm    عنوان   : Reply with quote

عادل عادل ليکلي:

السلام علیکم

محترم معزز وصیل پېروز صاحب،،، تاسو لومړی باید تعویذونه تفکیک کړی،،، هغه تعویذات په رښتیا هم ښه نه دي چې د بدوح دایرې پکې کاږي،،، حساب کتاب پکې لیکي،،، یا خو عاشق ته پې خپله معشوقه حاضروي،،،،

وعليک السلام
ښاغلی عادل صاحب ! هيله ده روغ ، جوړ او بريالي به ياست
د تعويذ په اړه زما نظر له تاسو سره تر يو څه حده موافقت لري، زه هم په دې اند يم چي ټول تعويذونه شر ک نه دي مګر هر تعويذ په هر حال کي هرومرو بدعت دی .
عادل عادل ليکلي:

دا چې تاسو په مطلق ډول تعویذ شرک ګڼی نو په دې صورت کې د هغو قراني ایاتونو سره زیاتی کوی چې په کاغذ کې لیکل کیژي او بیا خو یا په جیب، مټ یا غاړه کې ټینګیژي او یا هم د څاښت په توګه په اوبو کې څښل کیژي،،، نن سبا خلک ټول قران کریم په چرم پوښ او د یوه نسبتا غټ تعویذ په بڼه په جیبونو کې ګرزوي،،، تقبیل یا ښکلول یې بل غم دی چې تاسو یې بدعت ګڼی.

زه بايد ستاسو له انتقاد سره سم واضحه کړم چي ټولو تعويذونو ته د شرک په سترګه نه ګورم مګر بدعت يې ګڼم ، هغه تعويذونه چي د قرآني اياتونو په مټ پر خلکو تپل کېږي خورا ناوړه او کرغېړن بدعت دی چي نه هيڅ شرعي ثبوت لري او نه يې هم د اثبات لپاره کره دلايل شته .
دلته بايد زياته کړم چي کوم څوک تعويذ يوه روا اسلامي چاره بولي هغوئ بايد په صحيحو لاسوندونو او دلايلو خپل موقف او نظر صحيح ثابت کړي .
عادل عادل ليکلي:

هدف مې دا دی چې په خپلو فتواوو کې یو څه استثنااتو ته قایل شی،،،

زه مو ټولې لیکنې ښه په مینه لولم خو په خدای چې تاسو کله هم د خپلو خبرو په ترڅ کې چېرته ،،،، والله اعلم،،،، نه لیکی،،، په عقیدتي مسایلو کې په دې کچه ډاډ او استغنا هم ستاسو د ډول وهمي شرکیاتو ته پاتې کیژي.

ګستاخي معاف کړی،،، قربان مو شم

ښاغلی عادل عادل !
دا دی ستاسو له مشورې سره سم په دې اړه په خپله ليکنه کي ځيني تغيرات راولم اعنی هر تعويذ د شرک ټاپه نه ګڼم بلکي ځيني يې شرک ، ځيني يې سخت بدعت دی .
زه هيڅکله هم په ثابتو چارو کي شکوکو او شبهاتو ته لاره نه ورکوم بلکي تل پر الهي او نبوي لارښوونو په تکيه کولو د حق په اړه خپل نظر څرګندوم مګر بيا هم ستاسو پورتنۍ خبره د منلو او قبول وړ ده ځکه هيڅوک هم له خطا ، هېري او تېروتنې بري نه دی .
په مينه او درنښت
بېرته سر ته
د کارونکي عکس وښاياست شخصي پېغام وليږئ بريښناليک ولېږئ AIM Address Yahoo Messenger
وصيل پېروز
ستوري
ستوري


دغړيتوب نېټه: 20 فروري   2009
ليکنې: 342
ځای: زابل

ليکنهد ليکنې نېټه  : ٣   شنبه   اکتوبر   18, 2011 2:53 am    عنوان   : Reply with quote

ع. کريم حليمي ليکلي:

هر د سالم عقل خاوند که و جادوګر ، او کوډګر تعویذ ته پناه وړي
جادوګر او کوډګر او پناه ور وړونکئ ټول د کفر په درشل کښي ودرېدل !!!

ښاغلی حليمي ! ستاسو دا خبره پر ځای ده او زه يې هم تايدوم .
ع. کريم حليمي ليکلي:

او هر د سالم عقل خاوند او د ایمان خاوند چه الآية 255 د سورة البقرة
پر کاغذ ولیکي او په چرم کښي ئې پوښ‌ کړي او له ځان سره ئې ګرځوي او یا ئې د صدرۍ په کالر کي وګنډي ، نه ئې بد اخلاقي بللئ شو او نه بدعت

هر د سالم عقل څښتن چي په قرآن پوهېږي او د رسول الله صلی الله عليه وسلم سپېڅلي حديث يې لوستي وي هغه ته معلومه ده چي قرآني ايت پر کاغذ ليکل او په پوست کي ګنډل يې خورا ناوړه او کرغېړن عمل دی چي په شريعت کي هيڅ لاسوند نه ورته لرو ، که موږ تعويذ شرعي علاج بولو نو لازمه ده چي په شريعت کي يې ثبوت هم ولرو خو که شرعي علاج نه وي هسي د خلکو خپلې تجربې وي نو موږ يې په منلو مکلف نه يو.
ع. کريم حليمي ليکلي:

که دغه کار ته کوم څوک بد اخلاقي او بدعت وايي ، نو دئ پخپله د‌ تر پولي‌
اوښتئ دی

ښاغلی حليمي !
کوم څوک چي تعويذ يو روا عمل بولي هغوئ بايد لومړی خپل موقف د صحيحو دلايلو په رڼا کي کره ثابت کړي مګر که څوک د دې وس او وړتيا نه لري او يا هم د ده دا چاره کوم صحيح لاسوند نه لري هغوئ بايد پوه شي چي له نېغي لارې اوښتي دي .
ع. کريم حليمي ليکلي:

زه د هر حسن کار له پاره خلګ هڅوم ، سند مي :
والمؤمنون والمؤمنات بعضهم أولياء بعض يأمرون بالمعروف ......

دلته بيا هم د نېغو خبرو او بحث پر ځای په بې ځايه خبرو ځان له بحثه کاږئ ، تاسو به دا خبره هغه وخت کوله چي تعويذ مو د يو حسن عمل په توګه ثابت کړی وای مګر اوس داسي نه ده تاسو د خپل موقف د صحيح ثابتولو لپاره هيڅ دليل هم نه لرئ بلکي يوازي رسم ، دود ، رواج او عنعنې ته ګورئ چي دا په هيڅ صورت سالم دليل او صحيح لاسوند نه شي کېدلای بلکي ډېری وخت د اسلامي شريعت پر خلاف راځي چي پرېښودل يې اړين دي .
زه هم وايم چي تل حسن يا غوره چارو ته خلک رابولم او له بدو يې منعه کوم ستاسو پورتنی نقل کړی ايت مي دليل دی .
ع. کريم حليمي ليکلي:

درنو ترجمانانو ته پر ترجمو سربېره پوهه هم ضرور ده ، نه پوهیږم چه د بعضو ژباړنانو پوهي هیڅ جوش نه وي خوړلي فکر کوي چه عربي او E ئې
زده کړه ، ژباړه کولی شي ، نو فکر کوي چه عالم هم شوو ، اما داسي نده

نه پوهېږم هدف او مقصد مو څوک دی مګر په عام ډول ويلای شو چي د بحث مقابل لوری مو هدف دی نو په دې اړه بايد ووايم :
تاسو نه زما د زده کړو ، استعداد او پوهي په اړه معلومات لرئ او نه مو هم زما ليکنې ته کوم علمي ځواب ويلی دی بلکي د دې بر خلاف له تاسو سره هيڅ داسي دليل نه شته چي خپل ناروا موقف صحيح په ثابت کړئ ځکه حق او حقيقت هماغه دی چي ما يې وړاندي بيان وکړ ، زه الحمدلله کولای شم د صحيحو احاديثو له مخې تعويذ يوه ناروا چاره او بدعت ثابت کړم مګر تاسو د دې کار له کولو عاجزه ياست چي په دې صورت کي ستاسو پورتنۍ خبرې پر تاسو ډېري ښې پيټيږي . !!!
ع. کريم حليمي ليکلي:

څه د طب ، څه د نجوم ، څه د کیمیا ، څه د ریاضي ، څه د الجبر ، څه د فزیک ،........... څه درسره شته

ښاغلی حليمي صاحب !
بيا مو هم د سالم بحث لاره خوشي کړې او په خوشي چټي خبرو مو شروع کړې ده ، هر د سالم عقل څښتن انسان پوهېدای شي چي ستاسو خبرې نه کوم وزن لري او نه هم په ځواب ارزي مګر له دې وجې مو پر ځواب وخت ضائع کوم چي خلکو ته د دې رښتني حقيقت په اړه شبهات او شکوک پاتي نه شي .
زه ستاسو فهم او تعقل ته حيران يم نه پوهېږم په کوم فهم او کوم ادراک مو دا پورتنۍ کرښې کښلې دي دا نه يوازي چي د سالم او عاقل سړي ليکنه نه شي کېدای بلکي داسي ترې څرګندېږی لکه يو ماشوم او له هر څه ناخبره سړي چي ليکلې وي .
له تا پوښتم :
ايا پورتني علوم چي تاسو ياد کړي د قرآ ن او سنت په پوهه کي اړين دي ؟.
او ايا ته په علم التفسير ، علم الحديث ، اصول الحديث ، فقه ، اصول الفقه ، الجرح والتعديل ، مختلف و مؤتلف الحديث ، منطق ، فلسفه ، نحو ، صرف ، علم البلاغة ، علم البيان او علم البديع پوهېږې؟.
ع. کريم حليمي ليکلي:

احمقه ټولنه: نه شفاخانه لري ، نه دوا لري ، نه علم
او سور خولئ جارچي نعرې وهی چه تعویذونه مکوئ ، او لاد ئې مریض دی
لاس تر زنه نه کښېني ، د تعویذ خیار کښي څشي‌ ورته لریٖٖٖٖٖٖ ؟؟

نبی چه خلکو ته ویل چه په ځان ډبري مه ځړوئ ، که شفاخانه یې نه درلوده
معجزه یې درلودله ، چه څوک به ورته راغله چه مریض یم ، د اوښي متیازي
يې ور فرمایلې ،

زموږ په بې علمه او ناخبره ټولنه کي ستاسو په څېر ناخبره کسان اوسي چي پر ټولنې يې د علم او پوهي دروازې تړلې دي ، تاسو ياست چي په ټولنه کي د بدعتونو ، ناخوالو او مصيبتونو ورونه پرانيزئ او په دې ډول په ټولنه کي د رامنځ ته کېدونکي پرمختګ مخه نيسئ او غواړئ خلک له علم او پوهي ناخبره وساتئ ځکه په دې صورت کي کولای شئ چي د تعويذ ډرامه مو جاري وساتئ . ويلای شم چي نن زموږ ټولنه له کومو ناخوالو سره لاس او ګرېوان ده لامل او عامل يې ستاسو په څېر ناخبره اشخاص او بې علمه څېرې دي چي د خپلو مادي ګټو په خاطر خلک له ګڼو اسانتياوو ، غوره چارو او صحيحو افکارو بې برخې کوي .
نبي کريم صلی الله عليه وسلم تر خپل وفات وړاندي موږ په دې پوهولي يو چي حق او باطل څه دي؟ اوس که څوک پر دې حقيقت سترګې پټوي هغوئ بايد د الله له محاسبې او دوزخونه وېره وکړي .
د الله رسول هر وخت نه معجزې ښودلې او نه يې هم د ټولنې خلک د خپلو معجزو په وسيله له ناروغيو را ګرزول بلکي معجزي يو ځانګړی شی او په ځانګړي حالت کي يې ښودلې ده ، که تاسو په رښتيا هم اسلامي تاريخ او حديث لوستي وي نو ډېري داسي پېښي به ووينئ چي يو ځای تر نبي ويني توييېږي ، په زرګونو او سلګونو ټپيان له زخمونو شهيدانېږي ، تبې او ... نور يې د ژوند له نعمته بې برخې کوي مګر نبي نه يوازي دا چي خپله معجزه نه ښکاروي بلکي د مادي وسائلو استعمال ته يې رابولي .
ع. کريم حليمي ليکلي:

داچه معجزه درسره نشته ، شفاخانه او دوا خو مادي شئ باید وېلرې
دا راته وایه : چه دا دوا او طبیب ولي نه لرې ؟؟؟؟

دوا او شفاخنه او طبیبان مدرسې تر هر کلی ور ورسوه ، نو به د کوډګر او جادوګر دوکانداري ور ختم کړې ، او بس

Placebo څخه کار اخستل پناه ور وړل نه دي ، پلسیبو سبب دئ
قال تعالي (وجعلنا لكل شئ سببا )

تاسو بيا هم د بحث ار هدف پرېيښی او په ټولنه پر پېښو ناخوالو خبرې کوئ مګر په لنډو درته ويلای شم چي د دې هر څه عامل او لامل ستاسو په څېر کسان دي چي تل د ښوونځي ، ډاکټر ، سائنس پوه او معاصرو علومو د پوهانو مخنيوی کوي ، هغوئ په ډول – ډول نومونو بدناموي او په ټولنه کي يې د اثر ورسوخ د کمولو هڅې کوي .
تاسو ياست چي کليو او ښارونو ته مو د روغتون او شفاخانې د رسېدو مخنیوی کړی او په مقابل کي مو يې د ناروا تعويذونو او دمونو پراخې اډې پرانيستې چي خپلې مادي اړتياوې ترې پوره کوئ .
وروستيو کرښو ته مو بايد په ځواب کي ووايم :
موږ بايد د خپلو ناروغيو لپاره له هغو اسبابو ګټه واخلو چي په اسلام کي يې جواز تر لاسه کېږي ، که تعويذ تاسو د ناروغيو لپاره يو سبب ګڼئ نو ويلای شم چي د ناروغيو لپاره له دې سوب يا سبب څخه کار اخيستل حرام او ممنوع کار دی .
[/img]
بېرته سر ته
د کارونکي عکس وښاياست شخصي پېغام وليږئ بريښناليک ولېږئ AIM Address Yahoo Messenger
وصيل پېروز
ستوري
ستوري


دغړيتوب نېټه: 20 فروري   2009
ليکنې: 342
ځای: زابل

ليکنهد ليکنې نېټه  : ٣   شنبه   اکتوبر   18, 2011 2:58 am    عنوان   : Reply with quote

وزیري ليکلي:

ټولو وروڼو ته السلام علیکم ورحمة الله وبرکاته:

زه په دی نه پوهیږم چی له حضرت محمد صلی الله علیه وسلم نه رانیولی تر ننه پوری دا مذهبی علماء، مفسرین، محدثین او فقهاء نه پوهیدل چی په خپلو کتابونو کی یی دی شیانو ته ځای ورکړی او ستایلي دی او که دا نن سبا ددی حدیث مصداق (یخْرُجُ نَاسٌ مِنْ قِبَلِ الْمَشْرِقِ وَیَقْرَءُونَ الْقُرْآنَ لاَ یُجَاوِزُ تَرَاقِیَهُمْ، یَمْرُقُونَ مِنَ الدِّینِ كَمَا یَمْرُقُ السَّهْمُ مِنَ الرَّمِیَّةِ، ثُمَّ لاَ یَعُودُونَ فِیهِ حَتَّى یَعُودَ السَّهْمُ إِلَى فُوقِهِ) نه پوهیږی.

زه هم په دې نه پوهېږم چي له نبوي ممانعت سره – سره بيا هم ولي خلک د هغو چارو د جواز فتواوې ورکوي چي اسلامي شريعت يې په کلکه د مخنيوي غوښتنه کوي ان شرک او بدعت يې ګڼي ، وزيري صاحب ! ستاسو راوړی حديث د هغو خلکو پر خلاف يوه لوڅه توره ده چي له نبوي ممانعت سره – سره خپلو ناروا چارو ته په ډول – ډول بانو ، تحريفونو او حقيقت پټونې د جواز فتواوې لټوي ، هغه چي غواړي په حق پټونه خلک تېر باسي او خپلې ناروا چارې ته يوه صحيحه بڼه ورکړي ، د دې يوه لنډه بېلګه ستاسو په همدې ليکنه کي هم ليدلای شو او پورتنی حديث ستاسو د حالت ښه تشرېح کولای شي .
وزیري ليکلي:

دا خو یو واضح حقیقت دی چی هغه تعویذ په کوم کی چی شرکیه الفاظ لیکل شوی وی مطلقا ناروا عمل ده. او هغه تعویذ په کوم کی چی اسماء الله الحسنی لیکل شوی وی او په خپله تعویذ حقیقی مؤثر ونه ګڼل شی روا او نیک عمل ده. دا خبره می له خیټي ونه لیکله بلکی دی کتابونو وویلی:
مرقات شرح المشکاة، ص:۳۲۱ او ۳۲۲، ج۸، الترغیب والترهیب، ج۵ ص۲۷۱، ابوداوٴد شریف، ج۲، ص۹۲، الفتاویٰ رد المحتار، ج۵ ص۲۳۲

دا د واضح حقيقت خبره مو زه هم تائيدوم بلکي له راتلونکو کرښو سره مو سل په سل کي مخالف يم ، نه يوازي دا چي تعويذ روا عمل نه دی بلکي د شرک او بدعت تر سرحده رسي ، ستاسو راوړي دلايل اوس درته د حق په تله کي تلم چي څومره صحيح خېژي .
وزیري ليکلي:

اوس به راشم دیته چی وصیل پیروز ورور له مشکوة شریف نه یو حدیث را اخیستئ ده چی رسول الله صلی الله علیه وسلم فرمایلی دی ان الرقی والتمائم والتولة شرک).
پیروزه وروره! که چیرته دوه حدیث د یو او بل په مقابله کی واقع شی نو څه فکر به کوی چی نعوذباالله رسول الله صلی الله علیه وسلم غلط شوی او که ستا فهم کم دی؟ ستا په ځواب خو نه پوهیږم خو زما فهم دا وایی چی ته به غلط شوی یی.

په رښتيا هم په پورتني حديث کي دم ، تعويذ او د مينې تعويذونه شرک ګڼل شوي مګر ما وړاندي يادونه کړې وه چي دلته قيد شته دی او وروسته د دم کولو عمل روا ښودل شوی دی ، نه خو رسول الله صلی الله عليه وسلم غلط شوی ( نعوذ بالله ) او نه زه تېروتی يم بلکي د رسول الله صلی الله عليه وسلم د قول او فعل يوه غوره تشرېح مي کړې ده .
وزیري ليکلي:

په کوم حدیث کی چی تا الرقی ناروا شمارلی هغه نه مراد هغه تعویذات دی چی شرکیه الفاظ ولری. له دی نه هغه تعویذات مراد نه دی چی په اسماء الله الحسنی لیکل شوی وی. دلیل یی د ابوداؤد شریف دا حدیث ده:
عن عوف بن مالک قال کنا نرقی فی الجاهلیة فقلنا یا رسول الله صلی الله علیه وسلم کیف تری فی ذلک فقال اعرضوا علی رقاکم لا باس بالرقی ما لم تکن شرکا. (ابوداؤد، جلد دوم، صفحه ۱۸۶)

په کوم حديث چي تاسو دليل نيسئ په خپله تاسو يې هم په صحيح فهم اخیستنه کي خورا ستره تېروتنه کړې ده او يا هم غواړئ خلک تېر باسئ وړاندي تر دې چي ستاسو پر خبرو تنقيدي تبصره وليکم غواړم لومړی مو په دې پوه کړم چي دم او تعويذ ته په عربي ژبه کي څه وايي او تعريفونه يې څه دي ځکه دلته يو ځل بيا تاسو د (نتوسل) کيسه کړې ده . هههههه
په پښتو کي يو ساده غوندي متل دی وايي ( لومړی يې زده کړه بيا يې کوژده کړه ) اوس هم وزيري صاحب ! ته بايد لومړی په دې ځان پوه کړې چي په عربي ژبدود کي دم او تعويذ ته څه ويل کېږي ، يعني لومړی مو بايد په عربي ژبه ځان پوه کړی وای تر دې وروسته مو د خپل موقف د صحيح ثابتولو لپاره ميدان ته را دانګلي وای .
له اوږده انتظاره دي باسم په لنډو درته وايم چي په عربي ژبه کي تعويذ ته ( الرقية ) نه بلکي (تميمة) وايي چي په دې ډول ستاسو لانديني ټول دلائل غلط ثابتېږي .
غواړم لومړی د الرقية او تميمة تعريفونه وکړم څو خلک د دې دوو تر منځ توپير وکړای شي او ستاسو له ټګيو خوندي پاتي شي .
دم ته په عربي ژبدود کي رقية ، رُقياً ، ورَقيا ويل کېږي ، مضارع يې يرقی ، ماضي يې رقی او رقيت او واحد متکلم يې ارقی راځي ، اسم فاعل يې راق راځي چي د علاج ، درمل کولو ، شفاء او پورته کولو معنا لري . ( تفسير قرطبي لسم ټوک ، ۱۹ جز ، ۷۲ پاڼه ، تفسير کشاف ۴ / ۶۶۳ ، تفسير ابن کثير ۴ / ۵۳۲ د رياض چاپ ، معجم الوسيط ۱ / ۳۱۷ دار الدعوة استانبول ، دمونه او تعويذونه د ښاغلي پوهنمل زاهدي احمدزي ليکنه ص ۳۵ لومړی چاپ )
الله جل جلاله په قران کريم کي همدغه کليمه د اسم فاعل په صيغه استعمال کړې ده لکه چی د مرګوني سړي په اړه وايي :
كَلاَّ إِذَا بَلَغَتْ التَّرَاقِيَ * وَقِيلَ مَنْ رَاقٍ * وَظَنَّ أَنَّهُ الْفِرَاقُ ( القيامة : ۲۷ ، ۲۸ ، ۲۹ )
ژباړه : نه نه کله چي روح تر ستوني ورسېږي او وبه ويل شي چي کوم دم کوونکی شته ؟ او دی پوه شو چي دا د بېلتون وخت دی .
په دغو مبارکو اياتونو کي د من راق معنا ده د ده دم کوونکی څوک ده . تفسير پوهانو يې دويمه معنا دا کړې چي چي کله د زکندن پر مهال د جنت او جهنم ملائکې حاضري شي نو سره وايي به څوک به د ده د روح پورته وړونکی وي د جنت ملائکې او که د جهنم؟.
مګر دا چي معنا يې دم کوونکی او علاج کوونکي زياته موافقه ده ځکه چي په نبوي احاديثو کي هم دم کولو ته رقية ويل شوي دي چي وړاندي به ذکر شي مطلب دادی چي دم کولو ته په عربي ژبدود کي رقيه ويل کېږي عربي ژب پوهان هم د رقيه معنا په دم سره کوي .
د بخاري او مسلم له حديثو هم دا حقيقت په ډاګه څرګندېږي .
ښاغلی وزيري صاحب ! اوس به پوه شوي ياست چي په عربي ژبه کي الرقية دم ته وايي نه تعويذ ته او دم له يو څو شرطونو سره په مطلق ډول جائز دی چي پر دې د صحيحينو حديث شاهدي ورکوي . که ستاسو لپاره پورتنۍ تشرېح بس نه وي نو کولای شم چي په دې اړه نوري په لسګونو حوالې هم درسره شريکې کړم .
اوس به دا وڅېړو چي په عربي ژبه کي تعويذ ته څه ويل کېږي او لغت پوهان يې څرنګه تعريفوي څو د دم او تعويذ تر منځ د توپير په څرګندېدلو حقيقت جوت شي .
تميمة :-
په عربي ژبدود کي متعارف تعويذ ته تميمه ويل کېږي او جمع يې تمائم راځي او په عامه توګه هغه څوک چي تعويذ ليکونکی وي تمام ورته ويل کېږي . د تميمه معنا ده دفع کول او روغتيا بشپړول .
په معجم الوسيط کي ليکي :
التميمة :- ما يعلق فی العنق لدفع العين .
ژباړه : تميمه هغه شي ته ويل کېږي چي د نظر بد د ژغورنې په خاطر په غاړه کي راوځړول شي .
د لسان العرب ليکوال ليکي :
" تميم تعويذ ته ويل کېږي او واحد يې تميمة دی ، مراد ورڅخه هغه توري دانې دي چي سپين – سپين خالونه ور پکې وي په تار کي پېيلی کېږي او بيا د بلاګانو د دفع کولو په عقيده په غاړه کي اچول کېږي .
ابن جني ويلي دي : تميم هغه امېل ته ويل کېږي چي تسمه او منتر پکي وي لکه چي عرب وايي :
تممت المولود ای علقت عليه التمائم . ( لسان العرب ۱۲ / ۷۰ مخ )
ژباړه : د ماشوم په غاړه کي مي تعويذونه وځړول .
همدا راز يو عرب شاعر وايي :
تعوذ بالرقی من غير حبل ... وتعقيد فی قلائدها التميم
ژباړه : له لېونتوب پرته هم د دعاګانو تعويذ جوړلی شي او د هغې په غاړه کي د تعويذونو امېل ځوړند کولای شي .
د لسان العرب ليکوال ابو منصور وايي :
" په عربو کي دود وو چي د برګو دانو اميل به يې جوړ کړ او د ماشومانو په غاړو کي به يې د ناروغۍ او بلاګانو څخه د ژغورنې په تکل او عقيده ځوړندول چي د اسلام په راتګ سره باطل وګرځول شول ."
همدا راز ابو ذؤيب خويلد بن خالد هذلي په خپله هغه قصيده کي چي د خپلو هغو پنځو زامنو په ويرنه کي يې ويلې وه چي په مصر کي د طاعون په ناروغۍ وفات شوي وو داسي ويلي دي :
واذا المنية انشبت اظافرها ... الفيت کل تميمة لاتنفع ( الجامع فی تاريخ الادب لومړی ټوک ص ۴۱۵ مع ذوی القربی ۱۴۲۴ هـ)
ژباړه : او کله چي مرګ خپل نوکان ښخ کړل نو ما هر ډول تعويذ بې ګټې وموند چي هيڅ نفع نه رسوي .
او بل عرب شاعر هم په خپل شعر کي د تعويذونو يادونه په تمائمو سره کړې ده لکه چي وايي :
اذا مات لم تفلح مزينة بعده ... فنوطی عليه يا مزين التمائما
ژباړه : کله چي هغه مړ شو تر هغه وروسته مزينه ته هيڅ شي ګټه ونه رسوله ، اې مزينه ! که تعويذونه پرې وځړوې بيا هم کومه ګټه ورته نه رسوي .
په دغه شعر کي هم تعويذونو ته تمائم ويل شوي دي او په عربو کي له ناروغتيا څخه د روغتيا په تکل هر ځوړند کړل شوي شي ته تمائم ويل کېږي .
امام ابن الاثير ( مبارک بن محمد الجزري ) په خپل کتاب ( النهاية فی غربب الحديث والاثر ) لومړي ټوک کي کاږي :
تميمه له تمم څخه اخيستل شوی دی او تمام او التامات هم ورته ويل کېږي چي دبې عيبه او بشپړ په معنا سره هم را ځي او هغه کلام ته ويل کېږي چي له نيمګړتيا پاک وي او ور پسې وايي :
وقيل : معنی التمائم هاهنا انها تنفع المتعوذ بها وتحفظه من الافات وتکفيه .
ژباړه : او ويل شوي دي چي په ( اعوذ بکلمات التامات) د تمام معنا له افاتو څخه د متعوذ د ساتنې په معنا ده چي هغه لره همدغه دعا بس والی کوي .
ور پسې کاږي :
التمائم جمع تميمة وهی خزرات کانت العرب تعلقها علی اولادهم يتقون بها العين فی زعمهم فابطلها الاسلام . ( النهايه فی غريب الحديث والاثر لومړی ټوک ص ۱۹۷ د ايران چاپ ، ۱۳۶۴ هـ ش )
ژباړه : تمائم د تميمه جمع ده او دا هغه برګي مرۍ دي چي عربو به د خپلو اولادونو په غاړو کي په دې عقيده اميل او ځوړندولې چي د هغوئ په اند له نظر بد څخه يې ژغوري چي بيا اسلام د هغوئ دغه عمل باطل وګرځاوی .
مطلب دا چي په پښتنو کي معروف تعويذ ته په عربي ژبه کي الرقيه نه بلکي تميمه وايي لکه وزيري صاحب چي د الرقيې په اړه دلايل وړاندي کوي ، بلکي وزيري صاحب ! تاسو هغه د پښتنو په ساده ټکو له لويه سره غلط ياست لومړی بايد د الرقية او التميمة تر منځ توپير وکړئ وروسته دلايلو ته مخه کړئ .
اوس به تاسو او هر لوستونکی پوهېدلی وي چي د الرقية او التميمة تر منځ څومره لوی توپير دی ، تر دې وروسته ستاسو لاندي راوړي دلايل له يوې مخې ټول ناسم ثابتېږي ځکه ستاسو لانديني دلايل د التميمة په اړه نه بلکي د الرقية په اړه دي چي په شرعي رقيه يا دم کي زه له چا سره هيڅ اختلاف نه لرم بلکي د يو جائز عمل په سترګه ورته ګورم .
وزیري ليکلي:

په حدیث پوه علماء بیا داسی لیکی:

اول: ردالمحتار: صفحه ۳۶۳.
ولا باس بالمعاذات اذا کتب فیها القرآن او اسماء الله تعالی. و انما تکره العوذة اذا کانت بغیر لسان العرب، ولا یدری ما هو و لعله یدخله سحر.
دوهم: وفی شرح المسلم للنوی: اما الرقی بآیات القرآن و باالاذکار المعروفة فلا نهی فیه بل هو السنة ..... و قد نقلوا الاجماع علی جواز الرقی بکتاب الله تعالی و بذکره و منهی عنها اذا کانت باللغة العجمیة او بما لا یدری معنا لجواز ای یکون فیه کفرا. (دوهم جلد، صفحه ۲۱۹)
دریم: و فی فتح الباری: عن ابن مسعود رضی الله عنه ان النبی صلی الله علیه وسلم کان یکره عشر خصال فذکر فیها الرقی الا بالمعوذات و قال بعد اسطر وقد اجمع العلماء علی جواز الرقی عند اجتماع ثلثة شروط ان یکون بکلام الله تعالی او باسمائه وصفاته و باللسان العربی او بما یعرف معناه من غیره وان یعتقد ان الرقیة لا تؤثر بذاتها بل بذات الله تعالی و قال بعدا سطر فی حدیث عوف بن مالک اعرضوا علی رقاکم لاباس بالرقی ما لم یکن فیه شرک. (لسم جلد، صفحه ۲۳۹)
څلورم: و فی المشکوة: عن انس رضی الله عنه قال رخص رسول الله صلی الله علیه وسلم فی الرقیة من العین و الحمة والنمله. (صفحه ۳۸۷)
پنځم: و فی المرقاة: و لا یکره منها ما کان علی خلاف ذالک کالتعوذ بالقرآن و اسماؤ الله تعالی (جلد اتم، صفحه ۳۰۲)

ستاسو دا پورتني دلايل د الرقيې يادم جواز ثابتوي نه د تعويذ يا تميمې ، له همدې کبله يې صحيح ګڼلای شو او په دې پورتنيو دلايلو کي دا هم واضحه شوې چي دم يو لړ شرطونه لري له همدې کبله زه ورسره هيڅ اختلاف نه لرم او په بشپړ ډول يې تائيدوم مګر هو ! تاسو بايد د دم او تعويذ تر منځ توپير وکړئ ، ستاسو دا پورتني دلايل د دم جواز ثابتوي نه د تعويذ.
وزیري ليکلي:

نو پیروز جانه! ستا احادیث او آیاتونه ټول صحیح دی خو ستا فهم کی یوڅه کمی شته، مذهبی عالم ته کینه چی په دین دی پوه کړی او له دی خوارجي عقیدو نه دی وساتی.

والسلام

ښاغلی وزيري !
اوس تا او ټولو لوستونکو ته په ډاګه شوې وي چي زما په فهم کي کمی دی او که ستا ؟
تاسو دومره وړتيا هم نه لرئ چي د دم او تعويذ تر منځ تفکيک يا توپير وکړئ ، نو څرنګه په دې ناقص فهم د يو بل سړي پوهه او فهم تر پوښتنې لاندي راولئ؟
دا محاسبه لومړی له ځان سره وکړه چي په فهم کي مو څومره کمی دی ، تاسو ځان يو دين پوه بولئ مګر لياقت مو دومره کمزوری دی چي د دم او تعويذ ساده کليمو تر منځ توپير هم درته څرګند نه دی ، نه پوهېږم په رښتيا هم نه پوهېږئ او که غواړئ حق له خلکو پټ وساتئ . !!!
داچي تاسو ما د خارجي عقايدو څښتن ګڼئ نو خلک په دې حقيقت ښه پوهېږي چي حق او حقيت څه دی؟ په دې اړه بايد ووايم چي زما عقيده هماغه ده چي قرآن او حديث وايي ، له دې پرته ستاسو د مبتدعانه اورادو ، مبتدعانه طريقو او مبتدعانه نظرياتو له منلو په کلکه ډډه کوم بلکي پر ضد يې مبارزه او جهاد يو ستر کار راته ښکاري .
تاسو بايد له ما سره کښېنئ چي له دې بدعي او خرافانه عقايدو دي خلاص کړم ، همدا راز دي په لغت پوهنې او صيغو پوه کړم چي بيا نتوسل ماضي ونه ګڼئ او دم په تعويذ ترجمه نه کړئ ، ځکه ستاسو فهم که له يوې خوا دومره کمزوری دی چي د ساده صيغو او کليمو تر منځ توپير نه شي کولای له بل پلوه د يوې ښې قهقههه خندا وړ دی . !!!
بېرته سر ته
د کارونکي عکس وښاياست شخصي پېغام وليږئ بريښناليک ولېږئ AIM Address Yahoo Messenger
مخکيني ليکنی وښاياست:   
نوې موضوع پېل کړئ   موضوع ته ځواب ورکړئ    tolafghan.com دفورم سر ته   -> اسلام، اسلامي شرعه او د اسلام تاریخ    ټول وختونه GMT دي
پاڼي ته لاړ شئ 1, 2, 3, 4  مخکي
پاڼه   1  ټولې پاڼې  4

ورټوپ کړه:  

تاسو په دې څانګه  کې ليکنې نشئ کولی
تاسو د دې څانګې ليکنو ته ځواب نشئ ليکلی
تاسو په دې څانګه کې خپلو ليکنو ته بدلون نشئ ورکولی
تاسو له دې څانګې څخه خپلې ليکنې ړنګولی نه شئ
تاسو د دې څانګې په ټولپوښتنه کې برخه نشئ اخستلی


Powered by phpBB © 2001 phpBB Group

Chronicles phpBB2 theme by Jakob Persson (http://www.eddingschronicles.com). Stone textures by Patty Herford.